وزیر اعظم محمد شہباز شریف اور بل اینڈ میلنڈا گیٹس فاؤنڈیشن کے شریک چیئرمین بل گیٹس کے درمیان ٹیلیفونک رابطہ، مشترکہ مقاصد پر مل کر کام جاری رکھنے پر اتفاق

منگل 7 مارچ 2023 22:20

اسلام آباد (اُردو پوائنٹ اخبارتازہ ترین - اے پی پی۔ 07 مارچ2023ء) وزیر اعظم محمد شہباز شریف نے ملک سے پولیو کے خاتمہ کا عزم ظاہرکرتے ہوئے بل اینڈ میلنڈا گیٹس فائونڈیشن کے ساتھ تمام جاری شعبوں میں نتیجہ خیز شراکت داری کو مستحکم کرنے کی پاکستان کی خواہش کا اظہار کیا ہے۔ منگل کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف اور بل اینڈ میلنڈا گیٹس فاؤنڈیشن (بی ایم جی ایف )کے شریک چیئرمین بل گیٹس کے درمیان ٹیلیفونک رابطہ ہوا ۔

وزیراعظم نے بی ایم جی ایف کی جانب سے ملک میں پولیو کے خاتمے اور حفاظتی ٹیکوں، غذائیت اور مالیاتی شمولیت کو بہتر بنانے میں خاص طور پر ملک میں حالیہ سیلاب کے دوران پاکستان کو دی جانے والی قابل قدر مدد کو سراہا۔

(جاری ہے)

وزیر اعظم نے ملک میں پولیو کے خاتمے کے لئے وفاقی وزیر صحت عبدالقادر پٹیل اور ان کی ٹیم کی ان تھک کوششوں سے بل گیٹس کو آگاہ کرتے ہوئے ان کی کوششوں کی تعریف کی۔

انہوں نے تعاون کے تمام جاری شعبوں میں فاؤنڈیشن کے ساتھ نتیجہ خیز شراکت داری کو مزید مستحکم کرنے کی پاکستان کی خواہش کا بھی اعادہ کیا۔ وزیراعظم نے کہا کہ پاکستان ملک میں پولیو کی تمام اقسام کے خاتمے کے لئے پرعزم ہے۔ انہوں نے 2022 میں پولیو کے نئے کیسز کی رپورٹنگ پر تشویش کا اظہار کیا تاہم انہوں نے یہ بھی کہا کہ ستمبر 2022 سے پولیو کیسز میں وقفہ آیا ہے۔

دونوں رہنماؤں نے حکومت کے زیرقیادت دیگر پروگراموں پر بھی تبادلہ خیال کیا جن میں بی ایم جی ایف کی مدد سے غذائی قلت اور سٹنٹنگ، حفاظتی ٹیکوں کی ضروری خدمات، مائیکرو پیمنٹ گیٹ وے راست اور قومی بچت پروگرام کی ڈیجیٹلائزیشن شامل ہیں۔ گزشتہ سال کے تباہ کن سیلاب جس نے بڑے پیمانے پر نقل مکانی اور صحت کی دیکھ بھال کے بنیادی ڈھانچے کی تباہی کی وجہ سے پولیو کے قطرے پلانے کی جاری کوششوں کو بری طرح متاثر کیا تھا کا ذکر کرتے ہوئے وزیر اعظم نے کہا کہ حکومت خصوصی ایمرجنسی رسپانس پلان کو فعال طور پر نافذ کر رہی ہے اور اس کی موافقت جاری رکھے گی۔

بل گیٹس نے پولیو کے خاتمے کے لئے پاکستان کی کوششوں کو سراہتے ہوئے پولیو کے خاتمے کو یقینی بنانے کے لئے اپنی فاؤنڈیشن کی جانب سے پاکستان کے لئے مسلسل تعاون کا اعادہ کیا۔ دونوں رہنماؤں نے مشترکہ مقاصد پر مل کر کام جاری رکھنے پر اتفاق کیا۔