بحیرہ اسود پر امریکی ڈرون گرنے کے بعد امریکا نے روسی سفیر کو طلب کرلیا

بدھ 15 مارچ 2023 09:40

واشنگٹن (اُردو پوائنٹ اخبارتازہ ترین - اے پی پی۔ 15 مارچ2023ء) بحیرہ اسود پر امریکی ڈرون گرنے کے بعد امریکا نے روسی سفیر کو طلب کرلیا۔ روسی خبررساں ادارے کے مطابق بحیرہ اسود کے اوپر روسی لڑاکا طیارہ امریکی ڈرون سے ٹکرا گیا اور اس کے نتیجے میں امریکی ڈرون گر کر تباہ ہوگیا۔ اس واقعے کے بعد امریکا نے روسی سفیر اناتولی انتونوف کو طلب کرلیا۔

(جاری ہے)

امریکا نے کہا ہے کہ اس نے منگل کو روسی سفیر کو طلب کیا تھا جب ایک روسی لڑاکا طیارے نے بحیرہ اسود کے اوپر امریکی ریپر نگرانی کرنے والے ڈرون کو مار گرایا تھا۔امریکی فضائیہ کے یورپ اور افریقا کے کمانڈرجنرل جیمز ہیکر نے کہا کہ ہمار ا ’’ ایم کیو 9‘‘ طیارہ بین الاقوامی فضائی حدود میں معمول کی کارروائیاں کر رہا تھا جب اس سے ایک روسی طیارہ ٹکرا گیا اور وہ گر کر تباہ ہوگیا۔ درحقیقت روسیوں کے اس غیر محفوظ اور غیر پیشہ ورانہ اقدام نے دونوں طیارے تباہ کر دیے۔امریکی محکمہ خارجہ کے ترجمان نیڈ پرائس نے کہا کہ ماسکو میں امریکی سفیر نے روسی وزارت خارجہ کو سخت پیغام پہنچایا ہے۔ امریکی حکام نے اتحادیوں اور شراکت داروں کو واقعے کے بارے میں آگاہ کردیا ہے۔