سیاسی تناؤ میں کمی، صادق سنجرانی کی حکومتی اور اپوزیشن رہنماؤں سے ملاقاتیں

شوکت ترین، پرویز الٰہی، چودھری شجاعت، اعظم نذیر تارڑ، جہانگیر ترین سے الگ الگ ملاقاتیں

ہفتہ 18 مارچ 2023 20:55

سیاسی تناؤ میں کمی، صادق سنجرانی کی حکومتی اور اپوزیشن رہنماؤں سے ملاقاتیں

اسلام آباد (اُردو پوائنٹ اخبارتازہ ترین - این این آئی۔ 18 مارچ2023ء) ملک میں بڑھتی ہوئی سیاسی کشیدگی میں کمی لانے کے مشن کے دوران چیئر مین سینیٹ صادق سنجرانی کی متعدد رہنماؤں سے ملاقاتیں ہوئیں۔

(جاری ہے)

میڈیا رپورٹ کے مطابق دورہ لاہور کے دوران صادق سنجرانی نے حکومتی اور اپوزیشن قائدین کے ساتھ متعدد ملاقاتیں کیں، چیئر مین سینیٹ نے سابق وفاقی وزیر خزانہ شوکت ترین، سابق وزیراعلیٰ پنجاب چودھری پرویز الٰہی اور پاکستان مسلم لیگ ق کے سربراہ چودھری شجاعت حسین، وفاقی وزیر قانون اعظم نذیر تارڑ ، پی ٹی ا?ئی کے منحرف سینئر رہنما جہانگیر ترین سے الگ الگ ملاقاتیں ہوئیں۔

اس دوران منظور کاکڑ، عبدالقادر اور پرنس عمر احمد زئی بھی موجود تھے۔ملاقاتوں کے دوران سیاسی رہنماؤں سے مختلف امور پر باہمی دلچسپی کے امور اور ملکی مجموعی سیاسی صورتحال پر تبادلہ خیال کیا گیا۔ذرائع کے مطابق صادق سنجرانی نے ملکی سیاسی کشیدگی میں کمی لانے کے لیے کردار ادا کرنے پر زور دیا۔انہوں نے کہا کہ سیاسی ہم آہنگی کے لئے سب کو مل بیٹھنا ہوگا۔