ایشیاکپ پی سی بی کیلیے گلے کی ہڈی بن گیا، بھارتی ٹیم کے نہ آنے پر ایونٹ کی اہمیت کم ہونے کا خدشہ

اگلے میزبان سے میزبانی کے تبادلے پر غور، ایونٹ کی یو اے ای یا سری لنکا منتقلی ممکن، اربوں روپے کے متوقع نقصان کے پیش نظر بھارت میں شیڈول ورلڈکپ کا بائیکاٹ خارج از امکان

ذیشان مہتاب بدھ 22 مارچ 2023 12:08

ایشیاکپ پی سی بی کیلیے گلے کی ہڈی بن گیا، بھارتی ٹیم کے نہ آنے پر ایونٹ ..

لاہور (اردو پوائنٹ تازہ ترین اخبار ۔ 22 مارچ 2023ء ) ایشیا کپ پی سی بی کیلیے گلے کی ہڈی بن گیا جب کہ بھارتی ٹیم کے نہ آنے پر ایونٹ کی اہمیت کم ہونے کا خدشہ ستانے لگا۔ ایشیا کپ کا انعقاد ستمبر میں ہونا ہے، البتہ بھارت اپنی ٹیم کو پاکستان بھیجنے سے واضح انکار کر چکا، پی سی بی نے بھی سخت ردعمل دیتے ہوئے جواب میں اکتوبر میں شیڈول ورلڈکپ کیلیے سکواڈ بھارت بھیجنے سے انکار کا عندیہ دیا تھا۔

ذرائع کے مطابق دبئی میں ایشین کرکٹ کونسل اور آئی سی سی کی میٹنگز میں یہ معاملات زیرغور آئے، اس کے علاوہ بھی چیئرمین مینجمنٹ کمیٹی نجم سیٹھی کی بھارتی، سری لنکن، بنگلہ دیشی و اماراتی حکام سے الگ ملاقاتیں ہوئیں، اس دوران مختلف آپشنز پر تبادلہ خیال ہوا۔ پاکستانی حکام بخوبی جانتے ہیں کہ بھارتی ٹیم کے آنے کا ایک فیصد بھی امکان نہیں ہے، اس کے بغیر ایونٹ کرایا تو براڈکاسٹ و دیگر مد میں آمدنی نہیں ہو گی۔

(جاری ہے)

تندوتیز بیانات کی وجہ سے اب پیچھے ہٹنا بھی آسان نہیں، اس لیے کوئی ایسا حل تلاش کرنے کی کوشش ہو رہی ہے جس سے معاملہ حل ہو جائے اور بیک فٹ پر جانے کا تاثر بھی سامنے نہ آئے۔ ’’ایکسپریس‘‘ میں کئی روز قبل یہ رپورٹ شائع ہو چکی کہ صرف بھارتی ٹیم کے میچز یو اے ای میں کرانے پر غور ہو رہا ہے۔ البتہ اس صورت میں اخراجات میں غیرمعمولی اضافہ ہو جائے گا، نہ صرف بھارت بلکہ اس سے مقابلہ کرنے والی دیگر ٹیموں کو بھی سفر کرنا پڑے گا۔

نئی تجویز کے مطابق پاکستان ایک بار پھر اگلے میزبان سے ایونٹ کے تبادلے پر غور کر رہا ہے، رواں برس کی میزبانی اسے دیتے ہوئے اس کے بعد کی خود لے لی جائے گی، مکمل ایونٹ کی یو اے ای یا سری لنکا منتقلی بھی ممکن ہے۔ دوسری جانب اربوں روپے کے متوقع نقصان کے پیش نظر بھارت میں شیڈول ورلڈکپ کا بائیکاٹ خارج از امکان ہے، بورڈ حکام کسی درمیانی راہ کی تلاش میں ہیں۔