ہائی کورٹ نے عمران خان کے خلاف توہینِ عدالت کی درخواست پر آئی جی اسلام آباد کو نوٹس جاری کر دیا

بدھ 22 مارچ 2023 23:19

اسلام آباد (اُردو پوائنٹ اخبارتازہ ترین - این این آئی۔ 22 مارچ2023ء) اسلام آباد ہائی کورٹ نے عمران خان کے خلاف توہینِ عدالت کی درخواست پر آئی جی اسلام آباد کو نوٹس جاری کر دیا۔بدھ کو اسلام آباد ہائی کورٹ کے چیف جسٹس عامر فاروق نے توہینِ عدالت کی درخواست پر سماعت کی۔اے سی شالیمار نے جوڈیشل کمپلیکس میں توڑ پھوڑ پر توہینِ عدالت کی درخواست دائر کی تھی۔

درخواست گزار کے وکیل راجہ رضوان عباسی عدالت کے سامنے پیش ہوئے۔عدالت نے فائل گم ہونے والے کیس کے ساتھ اس کیس کو منسلک کر دیاجبکہ امن و امان کی صورتِ حال کے معاملے پر آئی جی اور اسلام آباد کی انتظامیہ سے رپورٹ طلب کر لی۔درخواست میں موقف اختیار کیا گیا کہ عدالت کا حکم تھا کہ چیئرمین پی ٹی آئی عمران خان امن و امان کی صورتِ حال پیدا نہیں کریں گے، مگر انہوں نے عدالتی حکم کی خلاف ورزی کی۔

(جاری ہے)

درخواست میں موقف اپنایا گیا کہ پی ٹی آئی کے کارکنان نے پولیس اور جوڈیشل کمپلیکس پر پتھرائو کیاجس کی وجہ سے پولیس اہلکار زخمی ہوئے۔درخواست میں کہا گیا کہ پولیس نے عدالتی حکم کے مطابق سیکیورٹی کے انتظامات کیے تھے، جبکہ عمران خان نے 17 مارچ کا عدالت کا ایک حکم بھی نہیں مانا۔درخواست میں استدعا کی گئی ہے کہ عمران خان کو طلب کرکے قانون کے مطابق کارروائی کی جائے۔عدالتِ عالیہ نے کیس کی سماعت 7 اپریل تک کیلئے ملتوی کر دی۔