پاکستان ذمہ دار اورامن کاداعی، مسلح افواج نے قوم کاسرفخرسے بلندکردیا، مسئلہ کشمیرایک بارپھرعالمی ایجنڈے پرنمودارہواہے،وفاقی وزیر طارق فضل چوہدری

اسلام آباد (اُردو پوائنٹ اخبارتازہ ترین - اے پی پی۔ 13 مئی2025ء) وفاقی وزیر برائے پارلیمانی امورڈاکٹرطارق فضل چوہدری نے کہاہے کہ پاکستان ذمہ دار اورامن کاداعی ملک ہے،خطے میں دیرپاامن کےلئے ہم مذاکرات کے حامی ہیں، مسئلہ کشمیرایک بارپھرعالمی ایجنڈے پرنمودارہواہے ،امریکا بھی تسلیم کررہاہے کہ اس مسئلے کوحل کئے بغیر خطے میں دیرپا امن ممکن نہیں، مسلح افواج نے پوری قوم کاسرفخرسے بلندکردیاہے۔

منگل کوقومی اسمبلی میں اظہارخیال کرتے ہوئے ڈاکٹرطارق فضل چوہدری نے کہاکہ پاکستان تاریخ کے اہم موڑپرہے، اسے نیاجنم ملاہے، 9اور10مئی کے پاکستان میں فرق ہے۔ انہوں نے کہا کہ پاکستان نے پوری دنیا کوباورکرایاہے کہ اللہ کے فضل سے ہم اپنے ملک کادفاع کاحق رکھتے ہیں اوردفاع کرنا بھی جانتے ہیں۔

(جاری ہے)

انہوں نے کہاکہ بھارتی جارحیت کے موقع پرقومی وحدت کاجومظاہرہ ہوا اس پرہم اللہ تعالیٰ کے شکرگزارہیں، بھارت نے شاید یہ حملہ اس لئے کیا کہ خدانخواستہ پاکستان کے اندرکوئی پولرائزیشن اورتقسیم ہے،اس کے علاوہ پاکستان میں بھارت کی پراکسیز کے گرد گھیرا بھی تنگ کردیا گیاتھا۔

ان کا کہنا تھا کہ ہماری مسلح افواج اوراداروں نے ان کی سپیس ختم کردی ہے اورجوباقی بچے کچھے عناصر ہیں ان کے خلاف کارروائی ہورہی ہے، اس لئے ہماری مسلح افواج کی توجہ ہٹانے کےلئے انہوں نے اس جارحیت کاارتکاب کیا۔ وفاقی وزیر نے کہاپارلیمان نے قومی وحدت کامظاہرہ کیا، اس پرمیں اپوزیشن اورحکومتی دونوں بینچوں کے ارکان کاشکرگزارہوں، ملک کے قریہ قریہ میں پاکستان زندہ بادکے نعرے لگ رہے ہیں۔

انہوں نے کہاکہ پاکستان امن کاداعی ہے، ہم امن چاہتے ہیں، پاکستان اوربھارت جوہری طاقتیں ہیں، ہم نے بھارت سے کہاتھا کہ وہ ہوش کے ناخن لے کیونکہ پہلگام کے فالس فلیگ آپریشن کے بعد پاکستان پرچڑھائی کی باتوں سے اس کااپنا نقصان ہوگا، ہم نے بھارت کویہ بھی بتادیاتھا کہ ہمیں دفاع کاحق حاصل ہے اوراپنا دفاع کرنا بھی جانتے ہیں،6 یا 7 مئی کی درمیانی رات کوبھارتی جارحیت کے خلاف اللہ تعالیٰ نے پاکستان کوفتح دلائی اور دشمن کے پانچ طیارے مارگرائے گئے،اس میں ناقابل تسخیررافیل طیارے بھی شامل تھے، اب پوری دنیا اس سوال کا جواب ڈھونڈنے میں لگی ہے کہ پاکستان نے یہ کامیابی کیسے حاصل کی ۔

انہوں نے کہاکہ ایک مسلمان اورمجاہد کاجذبہ جہاد کوئی دوسرا محسوس نہیں کرسکتا،اسی جذبے اورپروفیشنل ازم نے ہمیں کامیابی دلائی ، ہم افواج پاکستان کوخراج تحسین پیش کرتے ہیں جنہوں نے ہرپاکستانی کاسرفخرسے بلندکردیا،ہم سیدعاصم منیر اورملک کے ہیروظہیربابرکوخراج تحسین پیش کرتے ہیں۔ انہوں نے کہاکہ ایک طرف وہ فوج ہے جوشہادت کی خواہش لےکرمیدان میں اتری جبکہ دوسری طرف وہ فوج ہے جوموت سے ڈرتی ہے۔

انہوں نے کہاکہ پاکستان ایک ذمہ دارملک ہے، ہمیں سفارتی کامیابیاں بھی ملی ہیں، پوری دنیا نے پاکستان کی سفارت کاری اورمیڈیا کے کردارکوتسلیم کیاہے جبکہ بھارت اپنے میڈیا سے پوری دنیا میں ایکسپوزہوا۔ انہوں نے کہاکہ خطے میں دیرپاامن کےلئے ہم مذاکرات کے حامی ہیں، الحمدللہ مسئلہ کشمیرایک بارپھرعالمی ایجنڈے پرنمودارہوا اور امریکا بھی تسلیم کررہاہے کہ اس مسئلے کوحل کئے بغیر خطے میں امن ممکن نہیں ۔\932