پاک فوج کے شاہینوں نے آپریشن بنیان مرصوص میں بھارت کا جنگی غرور خاک میں ملا دیا ،ڈاکٹر فردوس عاشق اعوان

منگل 13 مئی 2025 16:28

سیالکوٹ (اُردو پوائنٹ اخبارتازہ ترین - اے پی پی۔ 13 مئی2025ء) سابق وفاقی وزیر ڈاکٹر فردوس عاشق اعوان نے کہا ہے کہ پاک فوج کے شاہینوں نے آپریشن بنیان مرصوص میں بھارت کا جنگی غرور خاک میں ملا دیا ہے۔ انہوں نے مقامی کالج میں منعقدہ تقریب سے خطاب کرتے ہوئے کہا کہ پاک فوج کی پیشہ ورانہ مہارت اور غیر متزلزل عزم کے سامنے بھارت گھٹنے ٹیکنے پر مجبور ہو گیا، پاک فوج نے نہ صرف دشمن کو منہ توڑ جواب دیا بلکہ دنیا پر واضح کر دیا کہ پاکستانی قوم اور اس کے محافظ کسی بھی جارحیت کا بھرپور جواب دینے کی صلاحیت رکھتے ہیں۔

انہوں نے مزید کہا کہ بھارتی میڈیا کا پراپیگنڈا بھی بے نقاب ہو چکا ہے جس نے اپنے عوام کو محض خوش فہمی میں مبتلا کر رکھا تھا۔ڈاکٹر فردوس عاشق اعوان نے پاک فوج کے ساتھ یکجہتی کا اظہار کرتے ہوئے کہا کہ پاکستانی قوم اپنے محافظوں کے ساتھ سیسہ پلائی دیوار کی مانند کھڑی ہے اور ملک کی سلامتی پر کوئی سمجھوتہ نہیں کیا جائے گا۔

(جاری ہے)

انہوں نےکہا کہ دشمن کے ناپاک عزائم کبھی کامیاب نہیں ہوں گے اور پاک فوج ہر محاذ پر مادرِ وطن کا دفاع کرتی رہے گی۔اس موقع پر دیگر شرکا نے کہا کہ پاکستان کی افواج قوم کا فخر ہیں اور ان کی بہادری ہر پاکستانی کے دل میں گہری عقیدت پیدا کرتی ہے۔تقریب میں اساتذہ، طلبا اور مقامی رہنماؤں نے شرکت کی اور پاک فوج کو خراجِ تحسین پیش کیا۔