سعودی عرب میں مقیم غیرملکیوں کیلئے حج کی شرائط عائد

پانچ سال یا اس سے زیادہ عرصہ تک حج نہ کرنے والے درخواست دینے کے اہل ہوں گے

ساجد علی ہفتہ 1 اپریل 2023 15:22

سعودی عرب میں مقیم غیرملکیوں کیلئے حج کی شرائط عائد

مکہ مکرمہ ( اُردو پوائنٹ اخبارتازہ ترین ۔ 01 اپریل 2023ء ) سعودی عرب میں مقیم غیرملکی باشندوں کے لیے حج کی شرائط عائد کردی گئیں، جس کے تحت 5 سال یا اس سے زیادہ عرصہ تک حج نہ کرنے والے درخواست دینے کے اہل ہوں گے۔ العربیہ نیوز کے مطابق سعودی عرب نے اپنے شہریوں اور مملکت میں رہنے والے غیرملکی رہائیشیوں سے حج کی درخواستیں طلب کرلی ہیں، آج یکم اپریل 2023ء سے سعودی عرب کے اندر سے آنے والے عازمین، شہریوں اور رہائشیوں سے درخواستوں کی وصولی شروع کی گئی ہے، تاہم صرف 5 سال یا اس سے زیادہ سالوں سے حج نہ کرنے والے ہی درخواست دے سکتے ہیں اور درخواستوں کی وصولی اس وقت تک جاری رہے گی جب تک حج کے لیے دستیاب جگہ ختم نہ ہوجائے۔

سعودی عرب کی وزارت حج و عمرہ کی جانب سے کہا گیا ہے کہ سال 1444ھ کے لیے حج اجازت ناموں کا اجرا 15 شوال سے شروع ہوگا تاہم فریضہ حج کی ادائیگی کی خاطر اجازت نامے کے اجراء کے لیے حفاظتی ٹیکوں اور ویکسی نیشن کی تکمیل لازمی شرط ہے۔

(جاری ہے)

اس حوالے سے وزارت حج کے "کیئر فار بینیفیشریز" کا کہنا ہے کہ حج کے موسم کے آغاز سے 10 دن پہلے ویکسی نیشن اورحفاظتی ٹیکہ جات کے کورس کی تکمیل لازمی ہے جب کہ نسک پلیٹ فارم میں رجسٹریشن کے لیے براہ کرم حج پرمٹ کی قسم کا انتخاب کریں، ایک ایسکارٹ شامل کریں اورایسکارٹ ڈیٹا کو مکمل کریں، حرمین شریفین میں نماز ادا کرنے کے لیے اجازت نامہ محفوظ رکھنا ضروری نہیں ہے بشرطیکہ کوئی شخص کرونا سے متاثر نہ ہو یا کرونا وائرس سے متاثرہ کسی کے ساتھ رابطے میں نہ رہا ہو۔

ادھر پاکستان میں توقع سے کم درخواستیں موصول ہونے پر وزارت حج نے خصوصی رعایت دینے کا اعلان کیا ہے، کیوں کہ سرکاری حج اسکیم کے تحت اب تک صرف 10 ہزار خواہشمند افراد نے درخواستیں جمع کرائی ہیں، 16 مارچ سے حج کی درخواستوں کی وصولی کا سلسلہ جاری ہے اور اب اسپانسر شپ اسکیم کے تحت بینکوں کو پچاس ڈالرز تک کم جمع کرانے پر بھی حج اخراجات وصول کرنے کی ہدایات کی گئی ہے۔