پاکستانی فری لانسرز اب گھر بیٹھے روپیہ اور ڈالر میں اکاؤنٹ کھول سکیں گے

پاکستان سافٹ ویئر ایکسپورٹ بورڈ نے فری لانس ڈیجیٹل اکائونٹ و کارڈ سہولت کا اجرا کردیا

منگل 2 مئی 2023 20:00

پاکستانی فری لانسرز اب گھر بیٹھے روپیہ اور ڈالر میں اکاؤنٹ کھول سکیں ..

اسلام آباد(اُردو پوائنٹ اخبارتازہ ترین - این این آئی۔ 02 مئی2023ء) وزارت آئی ٹی کے ذیلی ادارے پاکستان سافٹ ویئر ایکسپورٹ بورڈ نے بینک آف پنجاب کے اشتراک سے فری لانس ڈیجیٹل اکائونٹ و کارڈ’ سہولت کا اجرا کردیا ہے جس سے فائدہ اٹھاتے ہوئے فری لانسرز روپیہ اور ڈالر میں ڈیجیٹل اکائونٹ کھول سکیں گے اس سلسلے میں اسلام آباد کے مقامی ہوٹل میں تقریب کا اہتمام کیا گیا جس میں ممبر آئی ٹی سید جنید امام نے بطور مہمان خصوصی شرکت کی جبکہ صدر و سی ای او بینک آف پنجاب ظفر مسعود و دیگر حکام اور بڑی تعداد میں فری لانسرز شریک ہوئے۔

تقریب سے خطاب کرتے ہوئے ممبر آئی ٹی سید جنید امام نے کہا اب فری لانسرز گھر بیٹھے روپیہ اور ڈالرز میں اکائونٹ کھول سکیں گے، آئی ٹی سیکٹر کی ترقی میں فری لانسرز کے اہم کردار کو فراموش نہیں کیا جاسکتا ، ملک میں آئی ٹی ایکسپورٹ 15 ارب ڈالرز تک لے جانے کیلئے کوشاں ہیں۔

(جاری ہے)

انہوں نے کہا کہ وزیراعظم پاکستان کی ہدایت پر 15 ارب ڈالرز کا ہدف حاصل کرنے کے لیے جہاں وزارت آئی ٹی اپنا کردار ادا کررہی ہے وہیں کمرشل بینکوں کو بھی چاہیے کہ وہ آئی ٹی کمپنیوں اور فری لانسرز کے لیے سہولیات اور اپنی بینکنگ مصنوعات متعارف کروائیں۔

انہوںنے کہاکہ کمرشل بینکوں کی جانب سے سہولیات کی عدم فراہمی کے باعث بہت سی آئی ٹی کمپنیوں نے اپنے اکائونٹس بیرون ممالک کھلوا رکھے ہیں جس کی وجہ سے پاکستان کو زرمبادلہ کے بڑے نقصان کا سامنا ہے۔سید جنید امام نے کہا کہ آئی ٹی انڈسٹری کے مسائل کے حل اور انھیں زیادہ سے زیادہ مراعات دینے کیلیے اقدامات کیے جارہے ہیں۔اس موقع پر خطاب کرتے ہوئے صدر و سی ای او بینک آف پنجاب ظفر مسعود نے کہا کہ فری لانس ڈیجیٹل اکائونٹ و کارڈ پراڈکٹ فری لانسرز اور آئی ٹی پروفیشنلز کی ضروریات کو پورا کرنے کے لیے بنائی گئی ہے۔

اپنے خطاب میں چیف کمرشل آفیسر ذیشان خٹک نے کہا کہ پاکستان سافٹ ویئر ایکسپورٹ بورڈ آئی ٹی انڈسٹری کو مکمل سپورٹ فراہم کرنے کے لیے پر عزم ہے۔فری لانس ڈیجیٹل اکائونٹ و کارڈ کی تقریب اجرا سے ’ اگنائٹ ‘ کے سی ای او عاصم شہریار نے بھی خطاب کیا۔