Live Updates

پاک بھارت کے درمیان کشیدگی میں کمی کیلئے دونوں ممالک کے ڈی ایم جی اوزکے درمیان آج پھررابطہ متوقع

دونوں ممالک کے درمیان ہاٹ لائن پر صبح ساڑھے گیارہ بجے ہوگا جس میں فریقین 10 مئی کے سیز فائر کے فیصلے کی تفصیلات کا جائزہ لیں گے

فیصل علوی پیر 12 مئی 2025 11:00

پاک بھارت کے درمیان کشیدگی میں کمی کیلئے دونوں ممالک کے ڈی ایم جی اوزکے ..

اسلام آباد(اردوپوائنٹ اخبار تازہ ترین۔12 مئی 2025)پاکستان اور بھارت کے درمیان کشیدگی میں کمی کیلئے دونوں ممالک کے ڈی ایم جی اوزکے درمیان آج پھررابطہ متوقع،ہاٹ لائن پر صبح ساڑھے گیارہ بجے ہوگا جس میں فریقین 10 مئی کے سیز فائر کے فیصلے کی تفصیلات کا جائزہ لیں گے،سکیورٹی ذرائع نے اس رابطے کو اہم پیش رفت قرار دیتے کہنا ہے کہ دونوں ممالک کے درمیان براہ راست مذاکرات کی راہ بھی ہموار ہو رہی ہے جن کیلئے ابتدائی رابطے جاری ہیں۔

سفارتی ذرائع کے مطابق پاک بھارت سفارتی نمائندگان اور نیشنل سیکیورٹی ایڈوائزرز کے درمیان رابطے جاری ہیں جو ان مذاکرات کے وقت اور مقام کو حتمی شکل دیں گے۔ذرائع کا کہنا ہے کہ یہ مذاکرات کسی تیسرے ملک میں منعقد ہوں گے اور اس حوالے سے سعودی عرب کو ممکنہ میزبان مقام کے طور پر زیر غور لایا جا رہا ہے۔

(جاری ہے)

ڈی جی ایم اوز کے درمیان دس مئی کی سہ پہر بھی رابطہ ہوا تھا جس میں فوری سیز فائر پر اتفاق ہوا تھا۔

واضح رہے کہ دو روز قبل بھی پاکستان کی جانب سے بھارتی جارحیت کے بھرپور جواب کے بعد دونوں ممالک کے ڈائریکٹر جنرلز ملٹری آپریشنز (ڈی جی ایم اوز) کے درمیان رابطہ ہوا تھا۔ پاکستان اور ہندوستان کے ڈی جی ایم اوز کے درمیان رابطہ بارے بھارت کے سیکرٹری خارجہ نے آگاہ کیاتھا۔بھارتی سیکرٹری خارجہ کے مطابق پاکستان اور بھارت کے ڈی جی ایم اوز کے درمیان ساڑھے تین بجے رابطہ ہواتھا۔

فون کال میں سیز فائر پر رضامندی ہوئی تھی۔فریقین نے سیز فائر کرنے پر رضامندی ظاہر کی، زمینی، فضائی اور بحری سمیت ہر طرح کی فائرنگ اور فوجی کارروائی روکنے پر اتفاق ہواتھا۔بھارتی سیکرٹری خارجہ کا مزید یہ بھی کہنا تھا کہ دونوں ممالک کے ڈی جی ایم اوز 12 مئی کو دوبارہ بات کریں گے۔قبل ازیں پاکستان نے جوابی کارروائی کرتے ہوئے پاکستان نے بھارتی جارحیت کا منہ توڑ جواب دیتے ہوئے ادھم پور، آدم پور اور پٹھان کوٹ ائیر بیسز سمیت ائیر فیلڈ کو تباہ کیاتھا اور ملٹری چیک پوسٹوں کو نشانہ بنایاتھا۔پاک فضائیہ کی جانب سے بھارت کو سب سے بڑا جھٹکا بھارت کے فضائی دفاعی نظام ایس 400 کو تباہ کر کے دیا گیاتھا۔