28 مئی ملکی تاریخ کا ایک سنہرا روشن باب ہے،ڈائریکٹرحج ملک ریحان عباس کھوکھر

ملتان (اُردو پوائنٹ اخبارتازہ ترین - اے پی پی۔ 27 مئی2023ء) ڈائریکٹرحج ملک ریحان عباس کھوکھر نے کہا ہے کہ 28 مئی ملکی تاریخ کاایک سنہرا روشن باب ہے، پاکستان دلیرانہ فیصلے سے ایٹمی طاقت بنا آج پاکستان کا ایٹمی پروگرام صرف پاکستان ہی نہیں بلکہ 57 دیگر اسلامی ممالک کا ایٹمی پروگرام گرداناجاتا ہے،نو مئی پاکستان کی تاریخ کا سیاہ دن ہے،ہرپاکستانی شہیدوں کی یادگاراورجناح ہائوس کی بے حرمتی کے واقعات کی مذمت کرتا ہے۔

ان خیالات کااظہارانہوں نے کو ینگ پاکستانیزآرگنائزیشن ملتان اور نظریہ پاکستان فورم ملتان کے زیراہتمام یومِ تکریمِ شہدائے پاکستان و یوم تکبیرکی سلورجوبلی کے سلسلہ میں سپیرئیرکالج ملتان میں منعقدہ سالانہ یوم تکبیر کانفرنس سے بطور مہمان خصوصی خطاب میں کیا۔

(جاری ہے)

کانفرنس میں صدرنظریہ پاکستان فورم ماہرتعلیم وسابق ڈائریکٹرکالجزپروفیسرڈاکٹرحمید رضاصدیقی، سابق ایم پی اے بابو نفیس احمد انصاری،ڈسٹرکٹ آفیسرسپیشل ایجوکیشن ملتان میاں محمد ماجد،مذہبی سکالر پروفیسرعلامہ عبدالماجد وٹو،سیاسی و سماجی رہنما حافظ معین خالد،الحاج محمد اشرف قریشی،رشید عباس خان اورصدر ینگ پاکستانیز آرگنائزیشن نعیم اقبال نعیم نے بھی شریک تھے۔

اس موقع پر سابق ایم پی اے بابو نفیس احمد انصاری نے کہا کہ پاکستان ہمیشہ قائم رہنے کیلئے معرض وجود میں آیا ہے اوراللہ کے فضل سے ہمیشہ قائم رہے گا ،ایٹمی دھماکوں سے پاکستان کا دفاع ناقابل تسخیر ہو گیا پاکستانی ایٹمی اثاثے محفوظ ہاتھوں میں ہیں، پاکستانی عوام کے دل پاک افواج کے ساتھ دھڑکتے ہیں اوردفاع پاکستان میں قوم پاک افواج کے شانہ بشانہ کھڑی ہے ،پاکستانی افواج ملک کی جغرافیائی اورنظریاتی سرحدوں کی محافظ ہیں ،ان کے خلاف ہرزہ سرائی کرنا ملک سے غداری کے مترادف ہے۔

اس موقع پر پروفیسرعلامہ عبدالماجد وٹو،حافظ معین خالد،رشید عباس خان اورصدر ینگ پاکستانیزآرگنائزیشن نعیم اقبال نعیم نے کہا کہ پاکستانی ایٹم بم کسی جماعت یا پارٹی کا نہیں یہ پاکستان کا اثاثہ ہے اور پاکستان کی حفاظت کے لیے ہے،عالمی قوتیں شروع دن سے پاکستان کے ایٹمی پروگرام کے خلاف صف آرا ہیں، اب وقت آگیا ہے کہ امتِ مسلمہ کو متحد ہوکر ان کا مقابلہ کرنا ہوگا، کشمیراورفلسطین کے مسئلہ پر امت مسلمہ کا اتحاد ناگزیر ہوچکا ہے ،آج اسرائیل اوربھارت کھلم کھلا دہشت گردی کرکے نہتے کشمیریوں اورفلسطینی عوام کا قتل عام کررہے ہیں جن کو صرف اورصرف ہم متحد ہوکرروک سکتے ہیں۔

تقریب سے چئیرمین پاکستان رائٹرز ونگ قاری محمد عبداللہ،مسلم لیگی رہنما فرحان انصاری،اسٹنٹ منیجرریجنل بلڈ سینڑ سید محمد عاصم رضا شاہ نقوی،ماہرتعلیم پروفیسرمحمود حسین ڈوگر،قاضی عبدالغفار،وائس پرنسپل پروفیسرمحمد سہیل،پروفیسر امتیاز،پروفیسرعثمان الطاف،رانا محمد کامران،پروفیسرعصمت زہرائ،میڈم پلوشہ،ینگ پاکستانیزآرگنائزیشن کے انفارمیشن سیکرٹری علی رضا مرزا،رانا آصف زاوش اوردیگر نے بھی خطاب کیا۔تقریب کے آخر میں ملکی سلامتی و بقا کے لیے خصوصی دعا بھی مانگی گئی۔