قومی اسمبلی میں کارروائی اور طریقہ کار کے قواعد 2007 کے قاعدہ 49 میں ترمیم کی منظوری

منگل 30 مئی 2023 23:22

اسلام آباد(اُردو پوائنٹ اخبارتازہ ترین - این این آئی۔ 30 مئی2023ء) قومی اسمبلی میں کارروائی اور طریقہ کار کے قواعد 2007 کے قاعدہ 49 میں ترمیم کی قومی اسمبلی نے منظوری دے دی، اس ترمیم کا مقصد ایوان میں نماز کیلئے اذان کے بعد 15 منٹ کا وقفہ کیا جانا مقصود ہے۔ منگل کو ایوان میں صلاح الدین ایوبی نے قومی اسمبلی میں کارروائی اور طریقہ کار کے قواعد 2007 کے قاعدہ 293 کے تحت تحریک پیش کی کہ قائمہ کمیٹی کی رپورٹ کردہ صورت میں مذکورہ قواعد کے قاعدہ 49 میں ترمیم فی الفور زیر غور لائی جائے۔

ایوان سے تحریک کی منظوری کے بعد صلاح الدین ایوبی نے تحریک پیش کی کہ قائمہ کمیٹی کی رپورٹ کردہ صورت میں ترامیم منظور کی جائیں جن کی ایوان نے منظوری دیدی۔قومی اسمبلی میں مجموعہ ضابطہ دیوانی ترمیمی بل 2023 مشترکہ اجلاس کے سپرد کئے جانے کی تحریک منظور کر لی گئی۔

(جاری ہے)

اس ضمن میں سید جاوید حسنین نے تحریک پیش کی کہ قومی اسمبلی کی جانب سے منظور ہونے کے بعد 90 دن میں مقررہ مدت کے اندر سینیٹ سے یہ بل منظور نہیں کیا گیا، اس بل کو مشترکہ اجلاس کے سپرد کیا جائے جس پر ڈپٹی سپیکر نے یہ تحریک ایوان میں پیش کی جس کی ایوان نے منظوری دے دی۔

اجلاس کے دور ان قومی اسمبلی کی قائمہ کمیٹی برائے توانائی (پٹرولیم ڈویژن) کی بلوچستان میں ایرانی گیس کی فروخت سے متعلق ایوان میں اٹھائے گئے معاملہ سمیت پانچ رپورٹیں ایوان میں پیش کر دی گئیں۔ کمیٹی کے چیئرمین کی جگہ وجیہہ قمر نے بلوچستان میں ایرانی گیس کی فروخت سے متعلق ایوان میں اٹھائے گئے معاملہ پر قائمہ کمیٹی کی رپورٹ ایوان میں پیش کی۔

انہوں نے قومی اسمبلی کے حلقہ این اے 238 میں گیس کی قلت سے متعلق سید آغا رفیع اللہ کے اٹھائے گئے معاملہ پر کمیٹی کی رپورٹ ایوان میں پیش کی۔ انہوں نے سید حسین طارق کی جانب سے نکتہ اعتراض پر حیدرآباد میں گیس لوڈ شیڈنگ سے متعلق کمیٹی کی رپورٹ ایوان میں پیش کی۔ اس کے علاوہ محمد ہاشم نوتیزئی کی جانب سے بلوچستان میں گیس کی لوڈ شیڈنگ اور کم پریشر اور محمد جمال الدین کے توجہ دلائو نوٹس پر قائمہ کمیٹی کی رپورٹ ایوان میں پیش کی گئی۔