وزیر اعلیٰ بلوچستان کا این ای سی اجلاس میں شرکت نہ کرنے کا اعلان

وزیراعظم نے جو بھی یقین دہانیاں کروائیں، ان پر عملدرآمد نہیں ہوا، وزیراعلی بلوچستان میرعبدالقدوس بزنجو

دانش احمد انصاری پیر 5 جون 2023 21:56

وزیر اعلیٰ بلوچستان کا این ای سی اجلاس میں شرکت نہ کرنے کا اعلان

کوئٹہ (اردو پوائنٹ تازہ ترین اخبار ۔ 5 جون 2023ء ) وزیر اعلیٰ بلوچستان نے این ای سی اجلاس میں شرکت نہ کرنے کا اعلان کر دیا۔ انہوں نے اپنے بیان میں کہا کہ وزیراعظم شہباز شریف نے جو بھی یقین دہانیاں کروائیں، ان پر عملدرآمد نہیں ہوا۔ تفصیلات کے مطابق زیر اعلیٰ بلوچستان میر عبدالقدوس بزنجو نے کہا ہے کہ مجھ سمیت صوبے کا کوئی ممبر کل اسلام آباد میں ہونے والے این ای سی کے اجلاس میں شرکت نہیں کرے گا۔

وزیر اعلیٰ بلوچستان نے اپنے بیان میں کہا ہے کہ این ای سی اجلاس میں شرکت نہ کرنے کا حتمی فیصلہ وفاقی حکومت کے عدم تعاون کے رویہ کو دیکھتے ہوئے کیا ہے، وفاق نے بلوچستان کے حوالے سے جو بھی یقین دہانیاں اور وعدے اب تک کیے ان پر عملدرآمد نہیں ہوا، یہ رویہ انتہائی مایوس کن صورتحال کی نشاندہی کرتا ہے، سیلاب متاثرین کی بحالی کیلئے اعلان کردہ دس ارب روپے بھی فراہم نہیں کیے گئے۔

(جاری ہے)

انہوں نے کہا کہ وسائل کی کمی کے باعث سیلاب متاثرین تاحال کھلے آسمان تلے پڑے حکومتی امداد کے منتظر ہیں، وفاقی حکومت سے یہ بھی کہا ہے کہ بلوچستان کے اراکین سینٹ اور قومی اسمبلی کے تجویز کردہ منصوبوں کو وفاقی پی ایس ڈی پی میں شامل کیا جائے، بلوچستان کے ترقیاتی فنڈز محدود ہونے کی وجہ سے اراکین سینیٹ و قومی اسمبلی کو ترقیاتی فنڈز نہیں دے سکتے۔

عبدالقدوس بزنجو نے مزید کہا ہے کہ وفاقی حکومت کو بار ہا یاد دہانیاں کرائی گئیں اور وزیر اعظم کو مراسلہ بھی ارسال کیا گیا، صوبائی حکومت نے اپنے محدود وسائل بروئے کار لاتے ہوئے سیلاب متاثرین کی حتی المقدور امداد و بحالی کو یقینی بنایا، امید تھی کہ وفاقی حکومت کی جانب سے دس ارب روپے کی وصولی کے بعد ان سرگرمیوں کو مزید آگے بڑھایا جائے گا۔