کانگو، بغیر اجازت بیٹے کی تدفین پرفوجی باپ نے بیوی سمیت 13 افراد کو قتل کردیا

فوجی اہلکار نے بیٹے کی آخری رسومات میں شرکت کرنے والے رشتے داروں اور دیگر افراد کو جمع کیا اور غصے میں فائرنگ کردی

منگل 25 جولائی 2023 13:48

کانگو، بغیر اجازت بیٹے کی تدفین پرفوجی باپ نے بیوی سمیت 13 افراد کو قتل ..

برازاویلا(اُردو پوائنٹ اخبارتازہ ترین - این این آئی۔ 25 جولائی2023ء) افریقی ملک کانگو میں فوجی اہلکار نے بغیر اجازت اور اس کی غیر موجودگی میں بیٹے کی تدفین کرنے پر بیوی سمیت 13 افراد کو گولیاں مار کر قتل کر دیا۔ غیر ملکی میڈیا رپورٹس کے مطابق کانگو کے شمال مشرقی صوبے اتوری میں ہفتے کو فوجی اہلکار نے اس کی غیر موجودگی میں بیٹے کی تدفین کرنے پر اہل خانہ اور دیگر افراد پر فائرنگ کردی جس کے نتیجے میں اس کی بیوی، دو بچے اور سسرالیوں سمیت 13 افراد ہلاک ہوگئے۔

فوجی اہلکار کے بیٹے کی طبعی موت ہوئی، بیٹے کے انتقال کی خبر ملتے ہی اہلکار جو دوسرے گائوں میں ڈیوٹی سر انجام دے رہا تھا اپنے گھر واپسی کیلئے روانہ ہوا۔تاہم فوجی اہلکار جب گائوں پہنچا تو تب تک اس کے بیٹے کی تدفین کردی گئی تھی۔

(جاری ہے)

بغیر اجازت اور اس کی غیر موجودگی میں بیٹے کی تدفین کرنے پر فوجی اہلکار نے بیٹے کی آخری رسومات میں شرکت کرنے والے رشتے داروں اور دیگر افراد کو جمع کیا اور غصے میں فائرنگ کردی۔

فائرنگ کی وجہ سے اس کی بیوی اور 2 بچوں سمیت 13 افرادہلاک ہوگئے۔ واقعہ کے بعد فوجی اہلکار موقع سے فرار ہوگیا جس کی تلاش جاری ہے۔فوجی اہلکار کی فائرنگ سے ہلاک ہونے والے افراد میں 10 بچے بھی شامل ہیں۔کانگو فوج کے ترجمان کا کہنا تھا کہ معاملہ کچھ بھی ہو، آپ کسی کی جان نہیں لے سکتے، یہ ایک بے ضابطگی کا عمل ہے جس پر عدالتیں فیصلہ کریں گی۔