بھارت،شوہر نے بیوی کی انگلی دانتوں سے کاٹ کر الگ کردی

پولیس نے وجے کمار کے خلاف گھریلو تشدد کا مقدمہ درج کر کے معاملے کی تحقیقات شروع کر دی

جمعہ 4 اگست 2023 14:42

بھارت،شوہر نے بیوی کی انگلی دانتوں سے کاٹ کر الگ کردی

بنگلور(اُردو پوائنٹ اخبارتازہ ترین - این این آئی۔ 04 اگست2023ء) بھارت کی ریاست کرناٹک میں شوہر نے جھگڑے کے دوران بیوی کی انگلی کو دانتوں سے کاٹ کر اسے ہاتھ سے الگ کر دیا۔میڈیا رپورٹس کے مطابق پولیس نے بنگلور سے تعلق رکھنے والے وجے کمار کو گرفتار کر لیا جس نے لڑائی کے دوران اہلیہ کے ہاتھ کی چھوٹی انگلی کو متاثر کیا۔وجے کمار نے پہلے انگلی کو دانتوں سے کاٹ کر ہاتھ سے علیحدہ کیا اور پھر اسے چبا کر نگلنے کی کوشش بھی کی۔

(جاری ہے)

متاثرہ خاتون کی شناخت پشپا کے نام سے ہوئی جس کی وجے کمار سے 23 سال قبل شادی ہوئی تھی۔ جوڑے میں اکثر لڑائی جھگڑا ہوا کرتا تھا اور وہ کافی عرصے سے ایک دوسرے سے الگ رہ رہے ہیں۔28 جولائی کو وجے کمار نے پشپا کے گھر کا دورہ کیا اور دونوں میں کسی بات پر تلخ کلامی ہوئی۔ بات یہاں تک پہنچ گئی کہ دونوں نے ایک دوسرے پر ہاتھ بھی اٹھایا۔ اسی دوران ملزم نے بیوی کی انگلی ہاتھ سے الگ کی۔پولیس نے وجے کمار کے خلاف گھریلو تشدد کا مقدمہ درج کر کے معاملے کی تحقیقات شروع کر دی۔