سوئی ناردرن گیس نے ایک کھرب روپے سے زائد کی آمدنی کا سنگ میل حاصل کیا ہے، بریفنگ

لاہور (اُردو پوائنٹ اخبارتازہ ترین - اے پی پی۔ 22 اگست2023ء) سوئی ناردرن گیس پائپ لائنز لمیٹڈ کا کارپوریٹ بریفنگ سیشن لاہور سٹاک ایکسچینج پلازہ لاہور میں منعقد ہوا۔ منیجنگ ڈائریکٹرا یس این جی پی ایل عامر طفیل نے تجزیہ کاروں، سرمایہ کاروں اور شیئر ہولڈرز کو کمپنی کی کارکردگی اور اس کے مستقبل کے امکانات کے بارے میں آگاہ کیا۔تقریب سے خطاب کرتے ہوئے کمپنی کی انتظامیہ نے شرکا کو بریفنگ دی کہ کمپنی نے پہلی دفعہ ایک کھرب روپے سے زائد کی آمدنی کا سنگ میل حاصل کیا ہے اور مزید کہا کہ کمپنی کے منافع میں 5.66 فیصد کی کمی واقع ہوئی ہے جس کی بنیادی وجہ ڈبلی اے سی سی کے تحت آر او اے کی شرح میں تبدیلی یعنی 17.43 فیصد سے 16.6 فیصد تک کمی اور وفاقی حکومت کی جانب سے سپر ٹیکس کا نفاذ ہے۔

کمپنی کی انتظامیہ نے اس بات پر روشنی ڈالی کہ کمپنی کے گیس کے نقصانات (یو ایف جی) مالی سال 2020-21ء میں 8.60 فیصد سے کم ہو کر مالی سال 2021-22 ءمیں 8.06 فیصد رہ گئے ہیں۔

(جاری ہے)

توانائی کے شعبے کی صورتحال پر روشنی ڈالتے ہوئے انتظامیہ نے بتایا کہ مقامی قدرتی گیس کے وسائل کی کمی کی وجہ سے اب آر ایل این جی کا حصہ گیس کی سپلائی میں تقریبا 50 فیصد ہے جو ملک میں طلب اور رسد کی صورتحال کی وجہ سے مزیدبڑھ سکتا ہے۔

کمپنی انتظامیہ نے خاص طور پر حکومت کی کوششوں کو سراہا جن کی مدد سے توقع ہے کہ اس سال کے آخر تک سسٹم میں 100 ایم ایم سی ایف ڈی گیس کا حجم شامل ہو جائے گا۔ ایم ڈی ایس این جی پی ایل نے مزید بتایا کہ نئی دریافتوں میں کمپنی کے نیٹ ورک میں ولی فیلڈ سے گیس پہلے ہی شامل کی جا چکی ہے جبکہ شیوا کے کنوئیں سے مقامی قدرتی گیس رواں سال کے آخر تک داخل کیے جانے کا امکان ہے۔

کمپنی کے مستقبل کے نقطہ نظر کا اشتراک کرتے ہوئے، کمپنی کی انتظامیہ نے کہا کہ کمپنی اگلے 5 سالوں کے دوران ''قدرتی گیس یوٹیلیٹی'' سے ''انرجی کمپنی'' میں تبدیل کرنے پر غور کر رہی ہے۔ اس دوران، کمپنی کا مقصد مختلف اقدامات کو لاگو کرکے اپنے مرکز کی حفاظت کرنا ہے۔ کاروبار میں کمال اور جدت کا حصول اور نئے کاروباری مواقع حاصل کرکے توانائی کے شعبے میں اپنی پوزیشن برقرار رکھنا ہے۔

کمپنی کی سینئر مینجمنٹ بشمول جناب فیصل اقبال، سی ایف او؛ سید جواد نسیم، ایس جی ایم (بی ڈی)؛ جناب قیصر مسعود، ایس جی ایم (ڈی)؛ اور کمپنی سیکرٹری امتیاز محمود بھی اس موقع پر موجود تھے۔ سیشن میں تجزیہ کاروں، سرمایہ کاروں اور شیئر ہولڈرز نے ذاتی طور پر اور زوم سے بھی بڑی تعداد میں شرکت کی جنہوں نے منیجنگ ڈائریکٹر عامر طفیل کی قیادت میں کمپنی کی ٹیم کی طرف سے دی گئی بریفنگ میں گہری دلچسپی ظاہر کی۔