زیر التواء مقدمات کا معاملہ،چیف جسٹس نے اہم اجلاس کل طلب کر لیا

اسلام آباد (اردوپوائنٹ،اخبارتازہ ترین ۔ 19 ستمبر 2023ء) چیف جسٹس پاکستان نے اہم اجلاس کل طلب کر لیا۔ تفصیلات کے مطابق سپریم کورٹ کے بینچز کی تشکیل اور زیر التواء مقدمات کے معاملے پر اہم پیشرفت ہوئی ہے۔ چیف جسٹس پاکسستان جسٹس قاضی فائز عیسٰی نے اہم اجلاس کل 3 بجے طلب کر لیا۔ ذرائع کے مطابق چیف جسٹس نے پاکستان بار کونسل اور سپریم کورٹ بار کونسل کو اجلاس میں شرکت کی دعوت دے دی۔

اجلاس میں فراہمی انصاف کو بہتر بنانے کے معاملے پر وکلا تنظیموں سے تجاویز لی جائیں گی۔ دوسری جانب سپریم کورٹ آف پاکستان میں زمین کے تنازع سے متعلق کیس میں چیف جسٹس قاضی فائز عیسیٰ کے وکیل سے دلچسپ مکالمے پر عدالت میں قہقہے لگ گئے۔ مقدمے کی سماعت کے دوران چیف جسٹس قاضی فائز عیسیٰ نے ریمارکس دیئے کہ پٹھان تو سب سے اچھے ہوتے ہیں، جتنا اخلاق آپ کو وہاں ملے گا ایسا کہیں اور نہیں، پٹھانوں کا بس یہ ہے کہ وہ دشمنی بڑی لمبی چلاتے ہیں۔

(جاری ہے)

اس موقع پر وکیل کا یہ کہنا ہی تھا کہ "لگتا ہے میں نے غلط جگہ پر ایسی بات کردی" وکیل کے اس جملے پر عدالت میں قہقہے لگ گئے اور چیف جسٹس کا ساتھی ججز کو دیکھ کر کہا "مجھے نہیں لگتا بینچ میں اس معاملے پر اتفاق رائے ہوگا" چیف جسٹس کے اس جملے پر کمرہ عدالت پھر سے قہقہوں سے گونج اٹھا۔ سماعت کے دوران دلائل دیتے ہوئے وکیل نے کرائے کے معاہدے کی تاریخ کا حوالہ دینے کے لیے آدھی اردو آدھی انگریزی بولی تو چیف جسٹس نے اس بات وکیل کی کلاس لے لی اور ریمارکس دیئے کہ "آپ نے ابھی دو زبانوں کا قتل کیا ہے، یا تو اردو میں بتائیں یا پوری انگریزی بولیں"۔ جبکہ گزشتہ روز چیف جسٹس بننے کے بعد جسٹس قاضی فائز عیسیٰ پروٹول کے بغیر سپریم کورٹ پہنچے،انہوں نے پروٹوکول اور گاڑی لینے سے انکا کیا۔