نگراں حکومت نے پیٹرول کی قیمت میں کمی کی خوشخبری سنادی

ڈالر میں اضافے کے باعث مہنگائی میں اضافہ ہوا، یکم اکتوبر کو پیٹرولیم مصنوعات کی قیمتوں سے متعلق قوم کو خوشخبری ملے گی، نگراں وفاقی وزیر تجارت گوہر اعجاز

ہفتہ 23 ستمبر 2023 20:20

نگراں حکومت نے پیٹرول کی قیمت میں کمی کی خوشخبری سنادی
D کراچی (اُردو پوائنٹ اخبارتازہ ترین - آن لائن۔ 23 ستمبر2023ء) نگران وزیر صنعت و تجارت گوہر اعجاز نے کہا ہے کہ یکم اکتوبر سے پیٹرول کی قیمت میں کمی آجائے گی۔

(جاری ہے)

شہرقائد میں کاروباری برادری سے ملاقات کے بعد گورنر سندھ کامران ٹیسوری کے ہمراہ میڈیا سے گفتگو کرتے ہوئے انہوں نے بتایا کہ ڈالر کی قیمت میں اضافے کی وجہ سے پیٹرول سمیت تمام اشیامہنگی ہوئیں،اب انٹر اور اوپن مارکیٹ میں ڈالر کی قدر کم ہوئی ہے، حکومتی اقدامات کی وجہ سے کرنسی اپنی جگہ پر آگئی ہے، غیر قانونی طور طریقے سے ڈالر باہر بھیجنے والوں کے خلاف کریک ڈاؤن سے بھی بہتری آئی ہے۔

انہوں نے کہا کہ ہماری ذمہ داری ہے کہ صنعت اور تجارت کا خیال رکھیں، ڈالر کی قدر کم ہونے سے عوام کو ریلیف ملے گا، ڈالر کی قیمت بڑھنے کی وجہ سے مہنگائی بڑھی، یہ نہیں ہو سکتا کہ 17 ڈالر کی گیس خرید کر 4 ڈالر میں دیں۔نگران وزیر صنعت نے کہا کہ ایس آئی ایف سی میں سعودی عرب اور یو اے ای سے بڑی سرمایہ کاری آ رہی ہے۔