آشوب چشم ، پنجاب کے سکولوں میں تعطیلات کا اعلان

تعلیمی ادارے پیر کو کھلیں گے ،متاثرہ بچوں کو واپس گھر بھجوا دیا جائے گا

بدھ 27 ستمبر 2023 17:56

آشوب چشم ، پنجاب کے سکولوں میں تعطیلات کا اعلان

لاہور(اُردو پوائنٹ اخبارتازہ ترین - این این آئی۔ 27 ستمبر2023ء) صوبے میں آشوب چشم کی بڑھتی وبا کے پیش نظر نگراں وزیر اعلی پنجاب محسن نقوی نے آج بروز جمعرات سے نجی اور سرکاری سکولوں میں تعطیلات کا اعلان کر دیا۔نگراں وزیراعلی پنجاب محسن نقوی نے راوی روڈ پر قائم گورنمنٹ گرلز ہائی سکول کا اچانک دورہ کیا، جہاں طالبات نے سکول میں روشنی اور پنکھے کم ہونے کی بھی شکایت کی۔

حکومتی ہدایات کے باوجود سکول میں آشوب چشم کے شکار طلبہ و طالبات حاضر تھے ، جس پر نگراں وزیراعلی نے برہمی کا اظہار کیا ۔آشوب چشم کے شکار طلبہ کی سکولوں میں حاضری پر نگراں وزیراعلی پنجاب نے سیکرٹری سکول کو فوری طور پر سکول طلب کرلیا ۔وزیراعلی نے صوبے کے تمام نجی اور سرکاری سکولوں میں آج بروز جمعرات اور ہفتہ کی چھٹی دینے کی ہدایت جاری کردی جبکہ 12ربیع الاول کو عید میلادالنبی کی چھٹی ہوگی۔

(جاری ہے)

سوموار کو صبح تمام سکولوں کے باہر بچوں کو داخلے کے وقت اساتذہ چیک کریں گے ، جن بچوں میں آشوب چشم کی شکایت ہوئی انکو واپس گھروں کوبھیج دیا جائے گا۔ واضح رہے کہ لاہور اور دیگر شہروں میں آشوب چشم کے بڑھتے ہوئے مرض سے سکول کالجز کے طالبعلموں سمیت عام شہریوں کی ایک بڑی تعداد متاثر ہو چکی ہے ۔محکمہ صحت کے ذرائع کیمطابق لاہورشہر میں اب تک آشوب چشم کے وائرس سے تین ہزار سے زائد افراد متاثر ہوچکے ہیں ۔