مودی حکومت کی طرف سے مقبوضہ جموںوکشمیر میں آبادی کا تناسب تبدیل کیلئے اقدامات کا سلسلہ جاری

ہفتہ 7 اکتوبر 2023 16:20

سرینگر(اُردو پوائنٹ اخبارتازہ ترین - این این آئی۔ 07 اکتوبر2023ء) )نریندر مودی کی زیر قیادت بھارتی حکومت بھارت کے غیر قانونی زیر قبضہ جموںوکشمیر میں آبادیاتی تبدیلی لانے اور علاقے میں اپنا ہندوتوا ایجنڈا مسلط کرنے کی کوششوں کا سلسلہ جاری رکھے ہوئے ہے۔ کشمیر میڈیا سروس کے مطابق مودی حکومت نے 05 اگست 2019 کے غیر قانونی اقدامات کے بعد سے اپنی ریاستی دہشت گردی کو تیز کرنے کے ساتھ ساتھ مقبوضہ علاقے کی مسلم اکثریت کو اقلیت میں تبدیل کرنے کے لیے آبادکاری کے اپنے نوآبادیاتی منصوبے پر تیزی سے عملدرآمد شروع کر دیا ہے۔

اس نے اپنے تازہ ترین اقدام میں’’ اپنی زمین برائے بے زمین سکیم کے تحت‘‘ اب تک 9ہزار افراد کو پانچ مرلہ فی کس زمین الاٹ کی ہے۔ یہ بات جموں و کشمیر کے لیفٹیننٹ گورنر منوج سنہا نے گزشتہ روز کپواڑہ میں صحافیوںسے گفتگو کے دورا ن بتائی۔

(جاری ہے)

ماہرین کا کہنا ہے کہ اس اسکیم سے فائدہ اٹھانے والوں کی اکثریت بھارتی ہندوؤں کی ہے۔مودی حکومت نے پہلے ہی بھارتی صنعت کاروں کوصنعتوں کے قیا م اور انہیں مقبوضہ علاقے میں مستقل طور پر آباد کرنے کیلئے ہزاروں کنال اراضی دے چکی ہے۔

اس نے اقوام متحدہ کی قراردادوں کی سراسر خلاف ورزی کرتے ہوئے مقبوضہ علاقے میں عارضی طور پر مقیم بھارتی شہریوں کو نام نہاد اسمبلی انتخابات میں ووٹ ڈالنے کی بھی اجازت دی ہے۔کل جماعتی حریت کانفرنس اور علاقائی سیاسی جماعتوں پیپلز ڈیموکریٹک پارٹی، نیشنل کانفرنس اور کمیونسٹ پارٹی آف انڈیا( مارکسسٹ) نے کہا ہے کہ یہ اسکیم مودی حکومت کے علاقے کی آبادی کو تبدیل کرنے کے منصوبوں کا حصہ ہے۔یاد رہے کہ لیفٹیننٹ گورنر منوج سنہا نے رواں برس جولائی میں کہا تھا کہ انتظامیہ نے علاقے کے 1.99 لاکھ بے زمین لوگوں کو پانچ مرلہ زمین فراہم کرنا شروع کی ہے۔