عوام کو ترقی کے منصوبے اور خوشحالی دینے والا نواز شریف وطن واپس آ رہا ہے، مریم نواز

منگل 10 اکتوبر 2023 22:16

لاہور (اُردو پوائنٹ اخبارتازہ ترین - اے پی پی۔ 10 اکتوبر2023ء) پاکستان مسلم لیگ (ن) کی سینئر نائب صدر وچیف آرگنائزر مریم نواز نے کہا ہے کہ عوام کو ترقی کے منصوبے اور خوشحالی دینے والا نواز شریف وطن واپس آ رہا ہے،جبر کے طوفانوں میں ساتھ دینے والوں کو سلام پیش کرتی ہوں،نواز شریف قوم کو پھر مہنگائی سے نجات،سستی روٹی،سستا آٹا،سستی چینی دلانے آ رہا ہے۔

ان خیالات کا اظہار انہوں نے حلقہ این اے 133 اور این اے 127کی یونین کونسلوں کے چیئرمینوں، کونسلروں اور کارکنوں سے ملاقات کے موقع پر خطاب کرتے ہوئے کیا ۔ملاقات میں سابق اراکین قومی اسمبلی شائستہ پرویز ملک اور علی پرویز ملک کے علاوہ سابق ارکان صوبائی اسمبلی رمضان صدیق بھٹی،میاں محمد سلیم،چوہدری شہباز احمد اور خواجہ عمران نذیر نے بھی شرکت کی۔

(جاری ہے)

مریم نواز شریف سے ملاقات میں یونین کونسلوں کے نمائندوں، کارکنوں اور پارٹی رہنمائوں نے 21 اکتوبر کی تیاریوں پر گفتگو اور انتظامات کا جائزہ لیا جبکہ قائد محمد نواز شریف کے استقبال کے حوالے سے تجاویز پر بھی مشاورت کی گئی۔چیف آرگنائزر مریم نواز نے خطاب کرتے ہوئے کہا کہ عوام کے دلوں میں نواز شریف کی محبت کی تختی لگی ہے،اللہ تعالی کے کرم اور عوام کے ووٹ سے نواز شریف چوتھی بار وزیراعظم بنے گا۔

انہوں نے کہا کہ جب سب کہتے ہیں کہ پاکستان ٹھیک نہیں ہو سکتا،نواز شریف ہر بار پاکستان ٹھیک کر کے دکھاتا ہے،اب بھی ایسا ہی ہوگا۔عوام کو ترقی کے منصوبے اور خوشحالی دینے والا معمار نواز شریف وطن واپس آ رہا ہے،نواز شریف قوم کو پھر مہنگائی سے نجات دلانے آ رہا ہے،نواز شریف پھر بھائی کو بھائی سے ملانے اور معاشرے میں پھیلی نفرتیں مٹانے آ رہا ہے۔

مریم نواز شریف نے کارکنوں کے جذبے کو خراج تحسین پیش کرتے ہوئے کہا کہ جبر کے طوفانوں میں نوازشریف کا ساتھ دینے والوں کو سلام کرتی ہوں۔آخر میں دیگر شرکا نے اپنے خطاب میں کہا کہ نوازشریف نے وعدے پورے کئے،مریم نواز نے نوازشریف کے کارکنوں کی سرپرستی کی روایت آگے بڑھائی ،ہم اپنے قائد کے تاریخی استقبال کے لئے تن، من، دھن لگائیں گے۔