ڈی ڈبلیو 
اسلام آباد (اُردو پوائنٹ ۔ DW اردو۔ 06 نومبر 2023ء) کراچی کی حالیہ بدامنی اور جرائم کے بڑھتے ہوئے واقعات کو اگر 32 سال قبل کے تناظر میں دیکھا جائے تو یہ واضح طور پر سمجھ میں آتا ہے کہ ڈرگ مافیا اور غیر قانونی اسلحے کے تاجروں نے اپنے مقاصد کے حصول کے لیے روشنیوں کے شہر کو موت، لسانی، فرقہ وارانہ، مذہبی کشیدگی اور عدم برداشت والے شہر میں تبدیل کر دیا تھا۔
شہر کو اس نہج پر لانے میں کچھ مفاد پرست سیاستدان بھی شامل تھے۔شہر کی بگڑتی صورتحال کی ذمہ داری ہمیشہ افغان مہاجرین پر ڈالی جاتی رہی۔ سیاسی قائدین کی جانب سے کلاشنکوف اور ملک بھر میں ہیروئن کے استعمال میں اضافے کا الزام بھی افغان شہریوں کے سر تھوپ دیا گیا اور یہ سیاست دان خود بری الذمہ ہو گئے۔
(جاری ہے)
افغانستان پر سابق سوویت یونین کےحملہ کے بعد افغان باشندوں کی بڑی تعداد کراچی کے علاقے سہراب گوٹھ اس کے اطراف کے علاقوں میں آباد ہوگئی تھی۔
چنانچہ پولیس نے 12 دسمبر 1986ء کو سہراب گوٹھ کےاس علاقے میں آباد اسلحہ اور منشیات کے مبینہ ڈیلروں کے خلاف آپریشن کا آغاز کیا کیونکہ انتظامیہ کا خیال تھا کہ سہراب گوٹھ کا یہ علاقہ سپرہائی وے سے متصل ہے، جس کی وجہ سے آئے دن مظاہروں اورجھگڑوں کی وجہ سے کراچی کو ملک کے دیگر حصوں سے ملانے والی یہ شاہراہ بند ہوجاتی ہے۔
پولیس کو اندازہ نہیں تھا کہ اس علاقے میں موجود اسلحہ اورگولہ بارود کے اسمگلرز اتنے طاقتور ہو چکے ہیں کہ وہ مسلح مزاحمت کرکے پولیس کو پسپا کردیں گے۔صورتحال کو دیکھتے ہوئے اس وقت کے وزیراعلٰی غوث علی شاہ اورسندھ کے گورنرمرحوم لیفٹیننٹ جنرل ریٹائرڈ جہانداد خان نے کورکمانڈر کراچی سے مدد کی درخواست کی۔ فوری طور سے فوجی قافلے ملیرکینٹ سے سہراب گوٹھ پہنچ گئے۔ سہراب گوٹھ کے رہنے والے جب صبح بیدارہوئے تومعلوم ہوا کہ فوج نے پورا علاقہ گھیرے میں لے کر یہاں کرفیو نافذ کر دیا ہے۔ اس کے بعد بلڈوزرں کی مدد سے اس علاقے کی تمام غیر قانونی آبادیوں کو مسمار کردیا گیا۔
فوج کی نگرانی میں ہونے والے آپریشن کے خلاف کسی نے مزاحمت نہیں کی مگر صوبے کی دونمایاں لسانی اکائیوں کے درمیان کشیدگی کی فضا صاف طور پر محسوس کی جاری تھی۔
کراچی میں ایک بار پھر سہراب گوٹھ اور اطراف میں آپریشن کا فیصلہ ہوگیا ہے تاہم اب حالات مختلف ہیں۔ افغان آبادی کی تیسری نسل جوان ہو چکی ہے، جس کا افغانستان سے کوئی تعلق یا ناطہ نہیں رہا۔ افغان باشندوں نے شہر میں بھاری سرمایہ کاری کر رکھی ہے اور مختلف قسم کے کاروباروں کے مالک ہیں۔ افغان باشندے اب سوسائٹی کا حصہ بن چکے ہیں، جن کی بے دخلی کسی طورآسان ثابت نہیں ہو گی اور نا ہی پاکستان کے معاشرے میں رچ بس جانے والے ان شہریوں کو ملک بدری کے خوف میں مبتلا کرنے کا کوئی جواز موجود ہے۔
اس طرح اچانک کسی بھی آبادی کے خلاف کوئی آپریشن کیا جائے تو اس کا ردعمل ضرور سامنے آتا ہے اور اکثر یہ ردعمل شدید ہوتا ہے۔ کسی بھی قوم کو ملک سے نکالنے کے لیے من گھڑت الزامات لگانا یا ان کے خلاف ذہن سازی کرنا معقول نہیں۔ کیا پاکستان میں آباد تمام اقوام دودھ کی دھلی ہوئی ہیں؟ کیا پاکستانی شہری اسلحہ کا کاروبار نہیں کرتے؟ کیا پاکستانی میں آباد دیگر اقوام جرائم میں ملوث نہیں؟ ہرقوم میں ہر طرح کے لوگ ہوتے ہیں۔
شہر میں ہر برائی اور خرابی کا ذمہ دار افغان شہری نہیں۔ حکومت کو چاہیے کہ وہ کبھی اپنے گریبان میں بھی جھانکے۔متعلقہ سرکاری اہلکار رہائشی اجازت نامے کے بغیر رہنے والے افغان شہریوں کی واپسی منظم حکمت عملی کے تحت مرحلہ وار انجام دیں۔ دوسری جانب بڑی تعداد میں افغان باشندوں کو قانونی طریقے سے ریگولرائز کرکے پاکستان میں مزید قیام کی اجازت بھی دینا چاہیے۔
افغان باشندوں کی جبری واپسی سے افراتفری اوربدامنی پھیلنے کا اندیشہ ہے۔ کیونکہ کراچی کے موجودہ حالات میں کوئی بھی جرائم پیشہ گروہ افغان شہریوں کو بدنام کرنے کے لیے شہر کے حالات خراب کر سکتا ہے اور اس سے صرف نفرت ہی بڑھے گی۔نوٹ: ڈی ڈبلیو اردو کے کسی بھی بلاگ، تبصرے یا کالم میں ظاہر کی گئی رائے مصنف یا مصنفہ کی ذاتی رائے ہوتی ہے، جس سے متفق ہونا ڈی ڈبلیو کے لیے قطعاﹰ ضروری نہیں ہے
