شراکت داروں کی جانب سے کے الیکٹرک ڈسٹری بیوشن لائسنس کی تجدید کی مخالفت کا انکشاف

وفاقی حکومت کہتی ہے کہ الیکٹرک مہنگی بجلی بناتی ہے، اس لئے کے الیکٹرک کوسبسڈی دی جاتی ہے،کراچی چیمبر آف کامرس

منگل 28 نومبر 2023 17:25

کراچی (اُردو پوائنٹ اخبارتازہ ترین - این این آئی۔ 28 نومبر2023ء) کے الیکٹرک کے بجلی ڈسٹری بیوشن لائسنس کی تجدید کی سماعت میں نیپرا حکام نے انکشاف کیا کہ شراکت داروں نے کے الیکٹرک ڈسٹری بیوشن لائسنس کی تجدید کی مخالفت کی ہے۔تفصیلات کے مطابق نیپرا میں کے الیکٹرک کے بجلی کی ڈسٹری بیوشن لائسنس کی تجدید کی درخواست پر سماعت ہوئی ، نیپرا حکام نے کہا کہ کے الیکٹرک کا 20 سالہ لائسنس ختم ہو چکا ہے، کے الیکٹرک کو ڈسٹری بیوشن 6 ماہ کا عبوری لائسنس دیا گیا تھا اب عبوری لائسنس بھی جنوری میں ختم ہو جائے گا۔

حکام نے انکشاف کیا کہ اسٹیک ہولڈرز سے کے الیکٹرک لائسنس تجدید پر آرا طلب کی گئی تھیں، زیادہ ترشراکت داروں کی آرا کے الیکٹرک ڈسٹری بیوشن لائسنس کی تجدید کیخلاف آئی ہیں۔

(جاری ہے)

کے الیکٹرک حکام نے دعوی کیا کہ کراچی کے 70 فیصد فیڈرز لوڈشیڈنگ فری ہیں، کے الیکٹرک نے نجکاری کے بعد 4.4 ارب ڈالر کی سرمایہ کاری کی ہے، 60 ہزار اسمارٹ میٹرز انسٹال کئے ہیں۔

دوران سماعت کراچی چیمبر آف کامرس نے کہا کہ کے الیکٹرک کے مہنگے پلانٹس بند کئے جائیں، کراچی بڑاشہر ہے ایک سے زائد کمپنیوں کو لائسنس دیا جائے، بن قاسم پاور پلانٹ کی سرمایہ کاری مہنگی سرمایہ کاری ہے۔کراچی چیمبر آف کامرس نے کہا کہ وفاقی حکومت کہتی ہے کہ الیکٹرک مہنگی بجلی بناتی ہے، اس لئے کے الیکٹرک کوسبسڈی دی جاتی ہے، دیگر بجلی کمپنیوں کی نسبت کے الیکٹرک کے نقصانات زیادہ ہیں۔کورنگی ایسوسی ایشن نے کہا کہ نیپرا بجلی سستی کرنے کیلئے اقدامات کرے کیونکہ انڈسٹری بند ہورہی ہے۔کے الیکٹرک کے لائسنس کی تجدید کی درخواست پر نیپرا میں سماعت مکمل ہوگئی ،نیپرا اتھارٹی لائسنس کی تجدید کے حوالے سے بعد میں فیصلہ جاری کرے گا۔