کامران اکمل، را ئوافتخار انجم اور سلمان بٹ پاکستان کرکٹ ٹیم کے چیف سلیکٹر ،وہاب ریاض کنسلٹنٹ مقرر، ترجمان

جمعہ 1 دسمبر 2023 17:22

لاہور (اُردو پوائنٹ اخبارتازہ ترین - اے پی پی۔ 01 دسمبر2023ء) پاکستان کرکٹ بورڈ نے سابق کرکٹرز کامران اکمل، را ئوافتخار انجم اور سلمان بٹ کو چیف سلیکٹراور وہاب ریاض کے کنسلٹنٹ کے طور پر مقرر کر دیا ہے۔پی سی بی ترجمان کے مطابق یہ تینوں فوری طور پر اپنی ذمہ داریوں کا آغاز کریں گی جن میں 12 جنوری سے نیوزی لینڈ میں ہونے والی پانچ ٹی ٹوئنٹی انٹرنیشنل میچوں کی سیریز ان کی پہلی اسائنمنٹ ہوگی۔

یہ تینوں اراکین سلیکشن ڈیوٹی نہ ہونے کے دنوں میں اسکلز کیمپ میں اضافی ذمہ داریاں بھی نبھائیں گے۔کامران اکمل نے 53 ٹیسٹ 157 ون ڈے انٹرنیشنل اور58 ٹی ٹوئنٹی انٹرنیشنل میچوں میں پاکستان کی نمائندگی کی ہے اور تینوں فارمیٹس میں مجموعی طور پر 6871 رنز بنائے ہیں اور وکٹوں کے پیچھے 453 کیچز/ سٹمپڈ کیے ہیں۔

(جاری ہے)

وہ 2009 کا ٹی ٹوئنٹی ورلڈ کپ جیتنے والی ٹیم کے رکن تھے۔

رائو افتخار انجم بھی 2009 کا ٹی ٹوئنٹی عالمی کپ جیتنے والی ٹیم میں شامل تھے وہ ایک ٹیسٹ 62 ون ڈے اور2 ٹی ٹوئنٹی کھیل چکے ہیں اور78 انٹرنیشنل وکٹیں حاصل کرچکے ہیں۔سابق کپتان سلمان بٹ نے 33 ٹیسٹ 78ون ڈے انٹرنیشنل اور24 ٹی ٹوئنٹی انٹرنیشنل میں پاکستان کی نمائندگی کی ہے اور تینوں فارمیٹس میں 11 سنچریوں کی مدد سے5209 رنز سکور کیے ہیں۔ وہ بھی کامران اکمل اور را افتخار انجم کی طرح 2009 کے ٹی ٹوئنٹی ورلڈ کپ کی فاتح ٹیم کا حصہ تھے۔