اداکارہ یمنیٰ زیدی کی پہلی فلم ’’نایاب نام یاد رکھنا‘‘ کا پوسٹرجاری

منگل 5 دسمبر 2023 16:46

اسلام آباد (اُردو پوائنٹ اخبارتازہ ترین - اے پی پی۔ 05 دسمبر2023ء) پاکستان شوبز انڈسٹری کی معروف اداکارہ یمنیٰ زیدی کی پہلی فلم ’’نایاب نام یاد رکھنا‘‘ کا پوسٹر جاری کر دیا گیا۔فوٹو اینڈ ویڈیو شیئرنگ پلیٹ فارم انسٹاگرام پر اداکارہ نے پوسٹ شیئر کرتے ہوئے اپنی آنے والی فلم کا باضابطہ اعلان کیا ہے۔

(جاری ہے)

یمنیٰ نے فلم کا آفیشل پوسٹر شیئر کرتے ہوئے خوشی کا اظہار کیا اور لکھا کہ آئیے چلتے ہیں ہم اپنے پہلے آفیشل پوسٹر کے ساتھ نایاب کی دنیا میں قدم رکھتے ہیں، اسی جوش و جذبے کے ساتھ جو ہمارے مرکزی کردار میں نظر آرہا ہے۔

انہوں نے فلم کا خلاصہ بیان کرتے ہوئے مزید لکھا کہ اس دنیا کی افراتفری میں خوابوں کو حاصل کرنے کی خواہش و دوڑ میں ہمارے ساتھ شامل ہو جائیں، ایک پرجوش اور زندگی کے اتار چڑھاؤ سے بھرپور کہانی کے لیے تیار رہیں۔عمیر نثار علی کی ہدایت کاری میں بننے والی فلم ’’نایاب نام یاد رکھنا ‘‘سے یمنیٰ زیدی پہلی بار بڑے پردے پر جلوہ گر ہونے والی ہیں، اداکارہ فلم میں ایک کرکٹر کا کردار نبھا رہی ہیں۔یہ فلم رومینہ عمیر اور عمیر عرفانی کی پیشکش ہے۔