فلم اور ٹی وی کی مایہ ناز اداکارہ نجمہ محبوب کومداحوں سے بچھڑے 40برس بیت گئے

نجمہ محبوب نے ٹی وی کے بعد فلم نگری میں قدم رکھا اور بڑے پردے پر 79 فلموں میں اداکاری کے جوہر دکھائے

بدھ 6 دسمبر 2023 11:05

لاہور (اُردو پوائنٹ اخبارتازہ ترین - این این آئی۔ 06 دسمبر2023ء) فلم اور ٹی وی کی مایہ ناز اداکارہ نجمہ محبوب کو مداحوں سے بچھڑے چالیس برس بیت گئے، نجمہ محبوب نے اپنی جاندار اداکاری کی بدولت ٹی وی ڈراموں میں صلاحیتوں کا بھرپور لوہا منوایا۔

(جاری ہے)

اداکارہ نجمہ محبوب 1949ء میں راولپنڈی میں پیدا ہوئیں، انہوں نے سٹیج ڈراموں سے اداکاری کا سفر شروع کیا اور 1969ء میں ٹیلی ویژن کی طرف آئیں، ان کا پہلا ڈرامہ ’’ہاتھی دانت‘‘ تھا جو پی ٹی وی لاہور سے نشر ہوا، نجمہ محبوب نے ٹی وی پر متعدد سیریلز اور ڈراموں میں کام کیا، انہوں نے کئی فلموں میں بھی یادگار کردار نبھائے۔

نجمہ محبوب نے ٹی وی کے بعد فلم نگری میں قدم رکھا اور بڑے پردے پر 79 فلموں میں اداکاری کے جوہر دکھائے، ان کی پہلی فلم ’’خلش‘‘ تھی جبکہ’’نازک رشتے‘‘ ان کی آخری فلم ثابت ہوئی، یہ فلم 1987ء میں ریلیز کی گئی، نجمہ محبوب کی مشہور فلموں میں سلطانہ ڈاکو، ان داتا، ٹھگاں دے ٹھگ، غازی علم الدین شہید اور سالا صاحب شامل ہیں۔اداکارہ نجمہ محبوب لاہور میں ایک پنجابی فلم ’’رکشہ ڈرائیور‘‘ کی شوٹنگ کے دوران ٹرین تلے آ کر جاں بحق ہو گئی تھیں۔