وزیراعظم محمد شہباز شریف کا قطر کے امیر شیخ تمیم بن حمد الثانی کو ٹیلی فون

دوحہ میں اسرائیلی افواج کی طرف سے غیر قانونی اور بہیمانہ بمباری کی شدید مذمت

منگل 9 ستمبر 2025 23:10

وزیراعظم محمد شہباز شریف کا قطر کے امیر شیخ تمیم بن حمد الثانی کو ٹیلی ..

اسلام آباد (اُردو پوائنٹ اخبارتازہ ترین - اے پی پی۔ 09 ستمبر2025ء) وزیراعظم محمد شہباز شریف نے قطر کے امیر شیخ تمیم بن حمد الثانی کو ٹیلی فون کیا اور دوحہ میں اسرائیلی افواج کی طرف سے غیر قانونی اور بہیمانہ بمباری کی شدید مذمت کرتے ہوئے امیر قطر، شاہی خاندان اور قطر کے عوام کے ساتھ ہمدردی اور یکجہتی کا اظہار کیا۔ منگل کو وزیراعظم آفس کے میڈیا ونگ سے جاری بیان کے مطابق وزیراعظم نے اسرائیلی افواج کی طرف سے دوحہ میں بمباری کی شدید مذمت کی جس کے نتیجے میں قیمتی جانوں کا ضیاع ہوا اور شہری املاک کو نقصان پہنچا ہے، وزیراعظم نے اسرائیل کے حملے کو ایک گھناؤنا عمل قرار دیا، جس سے اس کے رہنماؤں کی ذہنیت کا پتہ چلتا ہے جو اپنے مذموم مقاصد کے حصول کےلئے کسی بھی حد تک جا سکتے ہیں۔

(جاری ہے)

انہوں نے اسرائیلی جارحیت کو قطر کی خودمختاری اور علاقائی سالمیت کی کھلی خلاف ورزی قرار دیا جو کہ ایک انتہائی خطرناک اشتعال انگیزی ہے اور یہ علاقائی امن و استحکام کو شدید خطرات سے دو چار کر سکتی ہے،وزیراعظم نے امیر قطر کو یقین دلایا کہ پاکستان اسرائیل کی جارحیت کے خلاف قطر کے ساتھ چٹان کی طرح کھڑا ہے۔انہوں نے اس نازک وقت میں امت کی صفوں میں اتحاد پر زور دیا۔

وزیر اعظم کی ٹیلیفون کال اور اس مشکل گھڑی میں قطر کے عوام کے ساتھ یکجہتی کے مخلصانہ اظہار پر شکریہ ادا کرتے ہوئے امیر قطر نے کہا کہ وہ وزیر اعظم کے جذبات سے بہت متاثر ہوئے ہیں ، جو پاکستان اور قطر کے درمیان گہرے برادرانہ تعلقات کی عکاسی کرتے ہیں۔ دونوں رہنماؤں نے علاقائی امن و سلامتی کے مفاد میں رابطہ برقرار رکھنے پر اتفاق کیا۔