نگران وزیراعظم انوارالحق کاکڑ کی صنعتوں کے لئے گیس کی قیمتوں کے حوالے سے صنعتکاروں کی مشاورت سے لائحہ عمل تیار کرنے کی ہدایت

اسلام آباد (اُردو پوائنٹ اخبارتازہ ترین - اے پی پی۔ 11 دسمبر2023ء) نگران وزیر اعظم انوار الحق کاکڑ نے صنعتوں کے لئے گیس کی قیمتوں کے حوالے سے صنعتکاروں کی مشاورت سے لائحہ عمل تیار کرنے کی ہدایت کرتے ہوئے کہا ہے کہ صنعتوں کے لئے بجلی کے بھی مسابقتی نرخ متعارف کروائے جائیں جس سے عام آدمی اور صنعتوں کو فائدہ پہنچے ۔ پیر کو وزیراعظم آفس کے میڈیا ونگ سے جاری بیان کے مطابق نگران وزیر اعظم انوار الحق کاکڑ سے صوبہ سندھ بالخصوص کراچی سے تعلق رکھنے والے معروف صنعتکاروں اور تاجروں نے ملاقات کی۔

ملاقات وزیر اعظم کے دورہ کراچی کے دوران صنعتکاروں اور تاجروں سے شروع کی گئی مشاورت کا تسلسل ہے۔ اس موقع پر گفتگو کرتے ہوئے نگران وزیراعظم انوار الحق کاکڑ نے کہا کہ ملکی ترقی اور خوشحالی میں صنعتکاروں اور کاروباری برادری کا کلیدی کردار ہے، حکومت صنعت و تجارت کے فروغ کے لئے ہر ممکن اقدامات اٹھا رہی ہے ۔

(جاری ہے)

انہوں نے ہدایت کی کہ صنعتوں کے لئے بجلی کے مسابقتی نرخ متعارف کروائے جائیں جس سے عام آدمی اور صنعتوں کو فائدہ پہنچے ۔

وزیر اعظم نے نگران وفاقی وزیر خزانہ اور نگران وفاقی وزیر توانائی کو صنعتوں کے لئے گیس کی قیمتوں کے حوالے سے صنعتکاروں کی مشاورت سے لائحہ عمل تیار کرنے کی ہدایت کی۔ وزیراعظم نے کہا کہ حکومت ٹیکس نیٹ بڑھانے کے لئے اقدامات کر رہی ہے، ٹیکس نیٹ بڑھانے کے لیے کاروباری برادری کا تعاون کلیدی اہمیت کا حامل ہے، ٹیکس نیٹ کے بڑھانے میں کاروباری برادری حکومت کا ساتھ دے ، عوام کی فلاح و بہبود اور معیشت کی بحالی کے لئے حکومت ادارہ جاتی اصلاحات کے ایجنڈے پر کام کر رہی ہے۔

تاجر برادری کے وفد نے سمگلنگ کی روک تھام، بجلی چوری کے تدارک کی مہم اور معیشت کی بحالی کے لئے کئے گئے اقدامات پر اطمینان کا اظہار کیا۔ ملاقات میں نگران وفاقی وزیر خزانہ ڈاکٹر شمشاد اختر ، نگران وفاقی وزیر توانائی محمد علی ، گورنر سندھ کامران خان ٹیسوری اور متعلقہ اعلی سرکاری افسران بھی موجود تھے۔وفد میں چیئرمین بزنس مین گروپ زبیر موتی والا، چیف کوآرڈینیٹر انڈسٹریل فورم محمد جاوید بلوانی، پیٹرن ان چیف لسبیلہ چیمبر آف کامرس اینڈ انڈسٹری مقصود اسماعیل، سابق چیئرمین آل پاکستان ٹیکسٹائل پراسیسنگ ملز ایسوسی ایشن سلیم پاریکھ، پیٹرن ان چیف بن قاسم ایسوسی ایشن آف ٹریڈ اینڈ انڈسٹری میاں محمد احمد، صدر نارتھ کراچی ایسوسی ایشن آف ٹریڈ اینڈ انڈسٹری فیصل معیز اور دیگر شامل تھے۔