وزیراعظم شہبازشریف آج شام قوم سے اہم خطاب کریں گے

وزیراعظم ملک کی موجودہ صورتحال اورآپریشن بنیان مرصوص پر قوم کو اعتماد میں لیں گے، پاک فوج کو حاصل ہونے والی کامیابیوں پربھی قوم کو آگاہ کریں گے

فیصل علوی ہفتہ 10 مئی 2025 13:15

اسلام آباد(اردوپوائنٹ اخبار تازہ ترین۔10 مئی 2025)وزیراعظم شہبازشریف آج شام قوم سے اہم خطاب کریں گے، وزیراعظم پاک بھارت کشیدگی ،ملک کی موجودہ صورتحال اورآپریشن بنیان مرصوص پر قوم کو اعتماد میں لیں گے،وزیراعظم شہباز شریف اپنے خطاب میں آپریشن بنیان مرصوص میں پاک فوج کو حاصل ہونے والی کامیابیوں پر قوم کو آگاہ کریں گے۔وزیراعظم شہباز شریف نے کامیاب آپریشن کرنے پر قوم کو مبارکباد پیش کی ہے۔

دریں اثناء وزیراعظم شہباز شریف نے افواج پاکستان کی بھارتی در اندازی کے خلاف کارروائیوں پر قومی سیاسی قیادت کو اعتماد میں لیا۔شہباز شریف نے سیاسی قیادت سے گفتگو کرتے ہوئے کہا کہ افواج پاکستان نے بھارتی جارحیت کا مربوط طریقے سے پر زور اور طاقت ور جواب دیا ہے۔ بھارت نے پاکستان پر میزائل اور ڈرون حملے کئے۔

(جاری ہے)

ان جارحانہ اقدامات کے باوجود پاکستان نے انتہائی تحمل سے کام لیا۔

ان کا کہنا ہے کہ بھارت کی ان پے در پے کارروائیوں کا ہماری بہادر افواج نے بھرپور جواب دیا۔ آپریشن بنیان مرصوص میں بھارت کی ان ملٹری تنصیبات کو خصوصی طور پر نشانہ بنایا جن سے پاکستان پر حملے کئے گئے۔ آج ہم نے بھارت کو منہ توڑ جواب دیا ہے اور بے گناہوں کے خون کا بدلہ لے لیا ہے۔سیاسی قیادت سے گفتگو کرتے ہوئے وزیراعظم شہباز شریف کا مزید کہنا تھا کہ پہلگام واقعے کے بعد پاکستان نے حقائق جاننے کیلئے غیر جانبدارانہ تحقیقات کا کہا جس کو بھارت نے ٹھکرا دیا تھا۔

آج صبح دوبارہ بھارت نے نور خان ایئربیس اور دیگر مقامات پر میزائل حملے کئے بھارتی حملوں میں نہتے اور معصوم شہریوں کو نشانہ بنایا گیا۔ ہم بھارت کی پاکستان کی سالمیت کو نقصان پہنچانے کی مذموم کوششوں کو ناکام بنانے کیلئے پرعزم ہیں۔وزیراعظم شہباز شریف سے گفتگو میں قومی سیاسی قیادت نے پاک فوج کے جوانوں کے تدبر، حوصلے اور پیشہ وارانہ مہارت کو خراج تحسین پیش کیا۔ وزیراعظم کو مشکل کی اس گھڑی میں اپنے اور پوری پاکستانی قوم کے تعاون اور یکجہتی کا یقین دلایا۔