ترقی کا خواب صحیح معنوں میں مکمل ہونے والے تعمیراتی منصوبوں کی تکمیل کے بعد ہی پورا ہو سکتا ہے، کمشنر نصیر اباد ڈویژن

جمعرات 28 دسمبر 2023 23:09

کوئٹہ (اُردو پوائنٹ اخبارتازہ ترین - اے پی پی۔ 28 دسمبر2023ء) کمشنر نصیر آباد ڈویژن طارق قمر بلوچ نے کہا ہے کہ پائیدار ترقی کا خواب صحیح معنوں میں مکمل ہونے والے تعمیراتی منصوبوں کی تکمیل کے بعد ہی پورا ہو سکتا ہے، حکومت کی جانب سے عوام کی فلاح و بہبود کیلئے کئی منصوبے زیر تعمیر ہیں ،ان منصوبوں کی تکمیل کے بعد لوگوں کی مشکلات میں واضح طور پر کمی واقع ہوگی ، تمام ایگزیکٹو انجینئرز اپنے پروجیکٹ کی تکمیل اور انہیں معیار کے مطابق مکمل کروانے کے لیے کڑی نگرانی کریں ،کام کے معیار پر کسی قسم کا سمجھوتہ ہرگز قبول نہ کریں ۔

ان خیالات کا اظہار انہوں نے ضلع اوستا محمد میں مختلف زیر تعمیر منصوبوں کے جائزے کے موقع پر افسران سے بات چیت کرتے ہوئے کیا ۔ڈپٹی کمشنر اوستامحمد محمدحسین بھی کمشنر کے ہمراہ تھے ۔

(جاری ہے)

کمشنر نے بلیک ٹاپ روڈ سالار خان جمالی ،بلیک ٹاپ روڈ غفار آباد تا حسن خان جمالی گوٹ کا معائنہ کیا ۔اس موقع پر ایگزیکٹ انجینئر روڈز عرفان علی نےانہیں بریفنگ دیتے ہوئے بتایا کہ یہ منصوبے تکمیل کے آخری مراحل میں ہیں ،شولڈرز پر کام تیزی سے جاری ہے ۔

دورے کے موقع پر کمشنر نے زیر تعمیر گرلز کالج اور سول ہسپتال میں گائنی وارڈ جبکہ لیبر ہسپتال کے تعمیراتی کام کا بھی معائنہ کیا ۔ایگزیکٹو انجینئر بلڈنگ اکبر علی لاشاری نے تمام منصوبوں کے متعلق تفصیل سے آگاہی فراہم کی ۔کمشنر نصیر آباد کو قبولہ ریگولیٹر کے مقام پر ایگزیکٹو انجینئر مہراللہ انصاری نے زیر تعمیر کینال کے گیٹس و دیگر امور اور پانی کی ترسیل کے متعلق تفصیل سے بریفنگ دی ۔

دورے کے موقع پر کمشنر نے ڈرینج سسٹم کا بھی جائزہ لیا ۔اس موقع پر اسسٹنٹ کمشنر عبدالماصر ایس ڈی اوز کریم بخش جویو ،وسیم احمد جمالی نصیب اللہ کھوسہ ،انجینئر عبدالعزیز کھوسہ سمیت دیگر آفیسران موجود تھے ۔افسران سے بات چیت کرتے ہوئے کمشنر نصیر آباد ڈویژن طارق قمر بلوچ نے کہا کہ ہم سب کی ذمہ داری ہے کہ ہم ان منصوبوں کی کڑی مانیٹرنگ کریں ،یہ تمام منصوبے عوام کے مفاد میں زیر تعمیر ہیں ،حکومت کی جانب سے ان منصوبوں پر خطیر رقم خرچ کی جا رہی ہے تاکہ ان منصوبوں سے علاقے میں ترقی اور خوشحالی کی نئی راہیں کھلیں۔