بحریہ ٹاؤن کیس میں عدالتی حکم پر41 ارب 25 کروڑ90 لاکھ روپے حکومتِ سندھ کومل گئے

جمعرات 11 جنوری 2024 16:41

کراچی(اُردو پوائنٹ اخبارتازہ ترین - این این آئی۔ 11 جنوری2024ء) بحریہ ٹاؤن کیس میں عدالتی حکم پر 41 ارب 25 کروڑ 90 لاکھ روپے حکومتِ سندھ کو مل گئے۔عدالتی احکامات کے بعد اسٹیٹ بینک آف پاکستان نے سپریم کورٹ میں جمع رقم حکومت سندھ کے اکائونٹ میں منتقل کردی۔نجی ہاؤسنگ اسکیم میں مبینہ بدعنوانی پر سپریم کورٹ نے بحریہ ٹائون انتظامیہ کوقسط وار رقم عدالت میں جمع کرانے کا حکم دیا تھا۔

(جاری ہے)

یاد رہے کہ گزشتہ برس نومبر میں سپریم کورٹ کے حکم پر بحریہ ٹاؤن کراچی کی جانب سے سپریم کورٹ میں جمع کرائے گئے کٴْل 65 ارب روپے میں سے حکومتِ سندھ کو 6 ارب روپے کی پہلی قسط موصول ہوئی تھی۔2019 میں سپریم کورٹ نے بحریہ ٹاؤن کی جانب سے کراچی کی سپر ہائی وے پر 16 ہزار 896 ایکڑ اراضی حاصل کرنے کے لیے 7 برس کی مدت میں 460 ارب روپے ادا کرنے کی پیشکش کو قبول کر لیا تھا تاہم بحریہ ٹائون نے گزشتہ برسوں کے دوران تقریباً 65 ارب روپے کی رقم جمع کرائی اور بعدازاں بقایہ رقم کے تصفیے کے لیے عدالت سے رجوع کرلیا تھا تاہم عدالت عظمیٰ نے فیصلہ دیا کہ بحریہ ٹاؤن نے سپریم کورٹ کے اکاؤنٹ میں وہ قسطیں جمع نہیں کرائیں جو اس نے ایک مخصوص وقت تک ادا کرنے پر رضامندی ظاہر کی تھی لہٰذا بحریہ ٹائون کو نادہندہ تصور کیا جائے گا۔