الیکشن کمیشن نے انتخابی ضابطہ اخلاق کی خلاف ورزی پر درجنوں امیدواروں کو جرمانوں کی سزائیں سنا دی

جمعہ 26 جنوری 2024 22:14

اسلام آباد (اُردو پوائنٹ اخبارتازہ ترین - آن لائن۔ 26 جنوری2024ء) الیکشن کمیشن نے انتخابی ضابطہ اخلاق کی خلاف ورزی پر درجنوں امیدواروں کو جرمانوں کی سزائیں سنا دی. ترجمان کمیشن کے مطابق الیکشن کمیشن کی ہدایات کی روشنی میں ضابطہ اخلاق کی خلاف ورزیوں کے خلاف مانیٹرنگ ٹیمیں متحرک ہیں ضابطہ اخلاق کی خلاف ورزی پر ڈسٹرکٹ مانیٹرنگ آفیسر مردان نے این اے 23 کے امیدوار عاقب اسماعیل کو 50 ہزار روپے، ڈسٹرکٹ مانیٹرنگ آفیسر بنوں نے پی کے 99 سے اے این پی کے امیدوار نورانی خان کو 10 ہزار روپے اور ڈسٹرکٹ مانیٹرنگ آفیسر مانسہرہ نے پی کے 39 کے امیدوار اکرام اللہ غازی کو 10 ہزار روپے جرمانہ عائد کیا۔

امیدواران نے جرمانہ سرکاری خزانہ میں جمع کرکے چالان پیش کردیا۔ترجمان کے مطابق پنجاب میں ڈسٹرکٹ مانیٹرنگ آفیسر ملتان نے امیدوار برائے پی پی 214 شہزاد مقبول بھٹہ اور محمد شریف راجپوت کو 15 ہزار فی کس جبکہ ڈسٹرکٹ مانیٹرنگ آفیسر لیہ نے امیدوار برائے پی پی 282 اسامہ گجر کو 20 ہزار جرمانہ عائد کیا۔

(جاری ہے)

اس کے ساتھ ہی چاروں صوبوں اور اسلام آباد میں ممنوعہ تشہیری ہورڈنگز اور مواد بھی روزانہ کی بنیاد پر ہٹایا جارہا ہے علاوہ ازیں مختلف اضلاع میں ڈسٹرکٹ مانیٹرنگ آفیسرز نے ضابطہ اخلاق کی خلاف ورزی پر 7 امیدواروں کو بذریعہ نوٹسز طلب کر لیا تا کہ قانون کے مطابق مزید کاروائی عمل میں لائی جاسکے۔

ترجمان کے مطابق چاروں صوبوں میں اب تک مختلف خلاف ورزیوں پر امیدواران ودیگر کو 71 نوٹس جاری کیے گئے ہیں اور ان پر کاروائی جاری ہے۔اب تک مجموعی طور پر 24 امیدواران اور لوکل گورنمنٹ کے چیئرمین و ڈسٹرکٹ چیئرمین کو جرمانے ہو چکے ہیں…. اعجاز خان