راولپنڈی کے شہریوں کیلئے بڑا تحفہ،پیر ودھائی موڑ سے کچہری چوک تک سگنل فری کوریڈور،3 انڈرپاسز، 2 پروٹیکٹڈ یوٹرن بنیں گے

اصغر مال روڈ کی تعمیر و توسیع ہو گی، وزیر اعلیٰ محسن نقوی نے پیرودھائی موڑ سے کچہری چوک تک سگنل فری کوریڈور پراجیکٹ کا سنگ بنیاد ر کھ دیا اصغر مال روڈ کے تعمیراتی کاموں کا آغاز،راولپنڈی میں ٹریفک کے مسائل مستقل بنیادوں پر حل کررہے ہیں‘وزیر اعلیٰ پنجاب محسن نقوی

ہفتہ 3 فروری 2024 22:41

راولپنڈی کے شہریوں کیلئے بڑا تحفہ،پیر ودھائی موڑ سے کچہری چوک تک سگنل ..

لاہور (اُردو پوائنٹ اخبارتازہ ترین - این این آئی۔ 03 فروری2024ء) وزیراعلیٰ پنجاب محسن نقوی کا راولپنڈی کے شہریوں کے لئے بڑا تحفہ۔پیر ودھائی موڑ سے کچہری چوک تک سگنل فری کوریڈور بنے گا ، منصوبے کے تحت 3 انڈر پاسز اور دو پروٹیکٹڈ یو ٹرن بنائے جائیں گے۔ وزیر اعلیٰ محسن نقوی کی ہدایت پر اصغر مال روڈ کی تعمیر و توسیع ہو گی ۔ وزیر اعلیٰ پنجاب محسن نقوی نے پیرودھائی موڑ سے کچہری چوک تک سگنل فری کوریڈور پراجیکٹ کا سنگ بنیاد ر کھ دیا۔

راولپنڈی کے مصروف ترین چوراہوں پر ٹریفک لوڈ کم کرنے کے 7.6 کلومیٹر طویل سگنل فری کوریڈور میگا منصوبے پر 8.2 ارب روپے لاگت آئے گی۔ وزیر اعلیٰ محسن نقوی نے کہا کہ راولپنڈی میں ٹریفک کے دیرینہ مسائل مستقل بنیادوں پر حل کررہے ہیں۔ قاسم مارکیٹ پر سنگل بیرل، جی پی او چوک اور پی سی چوک پر ڈبل بیرل انڈر پاسز بنائیں گے۔

(جاری ہے)

وزیر اعلی محسن نقوی نے اصغر مال روڈ کے تعمیراتی کاموں کا آغاز کیا ۔

اصغر مال روڈ کی مری روڈ سے چونگی نمبر 4 تک تعمیر نو کی جا رہی ہے۔ وزیر اعلیٰ محسن نقوی نے کہا کہ پوری کوشش ہے کہ اصغر مال روڈ کو مقررہ وقت سے قبل مکمل کیا جائے۔سڑک کے اطراف آبادی کی سیورئج لائنوں کی صفائی یقینی بنایا جائے گا تاکہ آبادی کا پانی سڑک پر نہ آئے۔اصغر مال روڈ شہر کی گنجان آباد علاقے میں موجود ہونے کی وجہ سے شہریوں کو بہت سی مشکلات کا سامنا کرنا پڑتا تھا۔

انہوں نے کہا کہ لنک روڈز کی مرمت و بحالی سے شہر میں ٹریفک کے مسائل حل ہوں گے۔ وزیر اعلی محسن نقوی کو دونوں منصوبوں کے بارے میں بریفنگ دی گئی ۔ صوبائی وزراء ایس ایم تنویر، ڈاکٹر جاوید اکرم، عامر میر، ڈاکٹر جمال ناصر، ابراہیم حسن مراد، چیف سیکرٹری،چیئرمین پلاننگ اینڈ ڈویلپمنٹ بورڈ، سیکرٹری تعمیرات و مواصلات، سیکرٹری صحت، سیکرٹری لوکل گورنمنٹ، سیکرٹری صنعت، کمشنر راولپنڈی، آر پی او، ڈپٹی کمشنر اور متعلقہ حکام بھی اس موقع پر موجود تھے۔