وفاقی وزیرتعلیم کا کیمبرج امتحانی پرچوں کے مبینہ لیک ہونے کے واقعے کا نوٹس

منگل 12 مئی 2026 19:57

اسلام آباد(اُردو پوائنٹ اخبارتازہ ترین - آن لائن۔ 12 مئی2026ء) وفاقی وزیر برائے وفاقی تعلیم و پیشہ ورانہ تربیت ڈاکٹر خالد مقبول صدیقی نے کیمبرج امتحانی پرچوں کے مبینہ لیک ہونے کے واقعے کا نوٹس لیتے ہوئے گہری تشویش اور افسوس کا اظہار کیا ہے۔انہوں نے کہا کہ ایسے واقعات ہزاروں طلبہ اور والدین کے لیے شدید ذہنی دباؤ، اضطراب اور بے یقینی کا باعث بنتے ہیں، خصوصاً ان طلبہ کے لیے جو محنت اور ایمانداری سے تیاری کرتے ہیں۔

وفاقی وزیر نے کہا کہ یہ معاملہ انتہائی سنجیدہ ہے، خاص طور پر جب گزشتہ سال بھی اسی نوعیت کے واقعات سامنے آئے تھے۔ I ڈاکٹر خالد مقبول صدیقی نے کیمبرج سے مطالبہ کیا کہ وہ اپنے امتحانی نظام، سکیورٹی پروٹوکولز اور نگرانی کے نظام کو مزید مؤثر اور مضبوط بنائے تاکہ شفافیت اور طلبہ کا اعتماد برقرار رکھا جا سکے۔

(جاری ہے)

انہوں نے آئی بی سی سی کو ہدایت کی کہ وہ کیمبرج حکام سے فوری رابطہ کرکے معاملے کی مکمل جانچ کرے، حقائق واضح کرے اور طلبہ کے مفادات کے تحفظ کے لیے ہنگامی اقدامات یقینی بنائے۔

وفاقی وزیر نے واضح کیا کہ حکومت پاکستان شفاف امتحانی نظام، میرٹ اور طلبہ کے تعلیمی مستقبل کے تحفظ پر کوئی سمجھوتہ نہیں کرے گی، اور تمام متعلقہ اداروں کو اپنی ذمہ داریاں پوری کرنا ہوں گی۔