مقبوضہ جموں و کشمیر کے 50فیصد سکول بنیادی سہولیات سے محروم ہیں ،رپورٹ

پیر 12 فروری 2024 15:36

سرینگر (اُردو پوائنٹ اخبارتازہ ترین - اے پی پی۔ 12 فروری2024ء) بھارت کے غیر قانونی زیر تسلط جموں و کشمیر میں ایک رپورٹ میں انکشاف ہوا ہے کہ 50فیصد سے زائد سکول ان ضروری سہولیات سے محروم ہیں جو سیکھنے کے سازگار ماحول کے لیے ضروری ہیں۔

(جاری ہے)

کشمیر میڈیا سروس کے مطابق یونیفائیڈ ڈسٹرکٹ انفارمیشن سسٹم فار ایجوکیشن ( یو ڈی آئی ایس ای)کے تازہ ترین اعداد و شمار سے پتہ چلتا ہے کہ تقریبا 10ہزارسکولوں میں لائبریری کی سہولیات نہیں ،تقریبا 10ہزارسکول کھیل کے میدانوں ، ہزاروں بیت الخلا اوردیگر سہولیات سے محروم ہیں جبکہ دس ہزارسکول ریمپ کے بغیر ہیں۔

یہ واضح کمی سکول ایجوکیشن ڈیپارٹمنٹ کے لیے طلبہ کو تعلیمی اور غیر نصابی سرگرمیوں میں شامل کرنے کے لئے اہم چیلنج اور پڑھنے کے کلچر کی نشوونما میں شدید رکاوٹ ہے۔ رپورٹ کے مطابق کھیل کے میدانوں کی کمی بچوں کو انتہائی ضروری جسمانی سرگرمیوں اور تفریحی مواقع سے محروم ، ریمپ کی عدم موجودگی خصوصی ضروریات کے حامل طلبہ کے لیے رسائی کے خدشات پیدا کرتی ہے جن پر توجہ نہیں دی جاتی ۔مقامی لوگ تعلیمی نظام کو درپیش ان بنیادی مسائل کو حل کرنے میں ناکامی اور غفلت پر قابض حکومت پر شدید تنقید کرتے ہیں۔