مسلم لیگ (ن) کے صدرشہبازشریف سے آزاد منتخب ہونے والے رکن قومی اسمبلی اور 4 ارکان پنجاب اسمبلی کی ملاقات

پیر 12 فروری 2024 17:34

اسلام آباد (اُردو پوائنٹ اخبارتازہ ترین - اے پی پی۔ 12 فروری2024ء) سابق وزیراعظم اور مسلم لیگ (ن) کے صدر شہباز شریف سے آزاد منتخب ہونے والے ایک رکن قومی اسمبلی اور 4 ارکان پنجاب اسمبلی نے پیر کو ملاقات کی جس میں انہوں نے مسلم لیگ (ن) میں شمولیت کا اعلان کیا ۔ مسلم لیگ (ن)میڈیا آفس کے مطابق این اے 189 سے سردار شمشیر مزاری، پی پی 195 سے عمران اکرم، پی پی 240 سے سہیل خان، پی پی 297 سے خضر حسین مزاری اور پی پی 249 سے صاحبزادہ محمد گزین عباسی نے سابق وزیر اعظم سے ملاقات کی ۔

(جاری ہے)

تمام ارکان نے قائد نواز شریف پر اعتماد کا اظہار کرتے ہوئے مسلم لیگ (ن) میں شمولیت کا اعلان کیا۔ شہباز شریف نے آزاد ارکان کا پارٹی میں شمولیت کا خیرمقدم کیا اور انہیں مبارکباد دیتے ہوئے کہا کہ آپ کے جذبے کو سراہتا ہوں،آپ پاکستان کو سنوارنے اور عوام کو مشکلات سے نجات دلانے والے قافلے کا حصہ بنے ہیں،پاکستان مسلم لیگ (ن) کا اولین ایجنڈا ملک و قوم کی معاشی خوشحالی ہے۔انہوں نے کہا کہ پہلے سے بھی بڑھ کر عوام کی خدمت کریں گے۔ نومنتخب ارکان اسمبلی نے نواز شریف اور شہباز شریف کی ملک وقوم کے لئے خدمات اور جذبے کو سراہا اور کہا کہ پاکستان کو نواز شریف کے پرخلوص وژن، ترقی کے ایجنڈے اور خدمت کے تجربے کی ضرورت ہے۔