: فیصل آباد، تھانہ مدینہ ٹائون کے علاقہ کینال روڈ پر رقم نہ دینے پر چھوٹے بھائی نے بڑے بھائی کو موت کے گھاٹ اتار دیا

اتوار 25 فروری 2024 17:15

I فیصل آباد(اُردو پوائنٹ اخبارتازہ ترین - آن لائن۔ 25 فروری2024ء) تھانہ مدینہ ٹائون کے علاقہ کینال روڈ پر رقم نہ دینے پر چھوٹے بھائی نے بڑے بھائی کو موت کے گھاٹ اتار دیا، پولیس نے نعش تحویل میں لیکر پوسٹ مارٹم کے بعد ورثاء کے حوالے کر کے قاتل بھائی کو گرفتار کر کے بازپرس شروع کر دی۔

(جاری ہے)

بتایا جاتا ہے کہ فیصل ٹائون کے رہائشی فخر جاوید نے اپنے بڑے بھائی اعظم جاوید سے بیرون ملک جانے کیلئے پیسے مانگے، رقم نہ دینے پر معمولی جھگڑا ہو گیا تو اعظم جاوید کار پر شہر کی طرف آ رہا تھا کہ جب وہ کینال روڈ 204چک کے قریب پہنچا تو چھوٹے بھائی نے چلتی کار پر فائرنگ کر دی گولیاں لگنے سے اعظم جاوید زخمی ہو گیا تو کار بے قابو ہو کر موٹرسائیکل سے ٹکرا گئی جسکی وجہ سے موٹرسائیکل سوار 17سالہ زین ولد عبدالکریم سکنہ 204چک بری طرح زخمی ہو گیا۔

واقعہ کی اطلاع ملتے ہی ریسکیو1122 کی ٹیم نے موقع پر پہنچ کر زخمیوں کو تشویشناک حالت میں ہسپتال پہنچایا۔ اعظم جاوید زخموں کی تاب نہ لاتے ہوئے زندگی کی بازی ہار گیا، پولیس نے نعش تحویل میں لیکر پوسٹ مارٹم کیلئے ہسپتال منتقل کر دی تو دوران تفتیش معلوم ہوا کہ رقم کے تنازعہ پر چھوٹے بھائی نے بڑے بھائی کو قتل کیا ہے، جس پر قاتل بھائی کو حراست میں لیکر حوالات بند کر کے تفتیش شروع کر دی ہے۔