ایتھوپین سفارتخانے کا اسلام آباد میں افطار ڈنر کا اہتمام

اسلام آباد (اُردو پوائنٹ اخبارتازہ ترین - اے پی پی۔ 30 مارچ2024ء) پاکستان میں ایتھوپیا کے سفیر جمال بیکر عبد اللہ نے پارلیمنٹرینز، حکومتی عہدیداروں، سفارتکاروں، سفیروں، ایتھوپیا سے تعلق رکھنے والے افراد اور سول سوسائٹی اور میڈیا کی شخصیات کے لیے گزشتہ روز افطار ڈنر کا اہتمام کیا۔ پاکستان کےممتاز مہمانوں بشمول سینیٹر مشاہد حسین سید، سینئر پارلیمنٹیرین رومینہ خورشید عالم، ڈائریکٹر جنرل وزارت خارجہ افریقی امور، ظفر بختاوری، افریقہ پاکستان ایسوسی ایشن کے صدر، پاکستان میں ماریشس کے ہائی کمشنر، راشد علی سوبدر اور کامسٹس کے ایگزیکٹو ڈائریکٹر نفیس زکریا نے بھی افطار ڈنر میں شرکت کی۔

پریس ریلیز کے مطابق ایتھوپیا کے سفیر کا کہنا تھا کہ ایتھوپیا، پاکستان اور پوری دنیا کے مسلمانوں کو رمضان کے مقدس مہینے پر مبارکباد پیش کی جو اس دنیا میں ہر ایک کے لیے رحمتیں لے کر آیا ہے۔

(جاری ہے)

انہوں نے کہا کہ پاکستان سخی لوگوں کا ملک ہے جو اپنے اردگرد کے دوسروں کے ساتھ ہمدردی، شفقت اور پیار کے گہرے احساس میں شریک ہونا پسند کرتے ہیں۔

سفیر نے ایتھوپیا اور اس کے لسانی، سماجی، مذہبی اور ثقافتی تنوع کے بارے میں بھی بات کی۔ انہوں نے بتایا کہ ایتھوپیا کے دارالحکومت ادیس ابابا نے رمضان کے مقدس مہینے کے دوران ایک تہوار کی شکل میں باقاعدگی سے ایک عظیم الشان گلی افطار کا مشاہدہ کیا۔سفیر نے وفاقی جمہوریہ ایتھوپیا اور اسلامی جمہوریہ پاکستان کے درمیان سماجی، ثقافتی، سیاسی اور اقتصادی مماثلتوں پر بھی بات کی۔

انہوں نے کہا کہ دونوں ممالک قدیم تہذیبوں کے وارث ہیں اور امن، انصاف، مساوات اور جمہوریت کی قدروں میں مشترک ہیں۔سفیر نے افطار ڈنر میں شرکت کرنے پر تمام مہمانوں کا شکریہ ادا کیا اور اس بات پر زور دیا کہ اس طرح کے اجتماعات کا مقصد دونوں ممالک کے درمیان پہلے سے پروان چڑھتے دوطرفہ تعلقات کو مزید مضبوط بنانا ہے۔