قائد پی ٹی آئی عمران خان، پارٹی رہنماؤں اور کارکنوں کی رہائی اور نوجوان پارٹی رہنما مراد سعید کے تحفظ کیلئے ضلع کوہاٹ میں بڑا احتجاجی مظاہرہ

ہفتہ 6 اپریل 2024 20:51

پشاور(اُردو پوائنٹ اخبارتازہ ترین - آن لائن۔ 06 اپریل2024ء) ناحق اور بے گناہ پاپند سلاسل قائد پاکستان تحریک انصاف عمران خان، پارٹی کے دیگر رہنماؤں اور کارکنوں کی رہائی اور نوجوان پارٹی رہنما مراد سعید کے تحفظ کیلئے ضلع کوہاٹ میں ایک بڑا احتجاجی مظاہرہ ہوا جس میں خیبر پختونخوا کے وزیر قانون و پارلیمانی امور آفتاب عالم آفریدی ایڈوکیٹ، اراکین قومی اسمبلی شہریار خان آفریدی اور شاہد خان خٹک، اراکین صوبائی اسمبلی محمد شفیع جان اور سہیل آفریدی، صوبائی اسمبلی کوہاٹ کے امیدوار داؤد آفریدی، شفقت آیاز اور پی ٹی آئی کوہاٹ کے سینئر رہنماوں سمیت پارٹی کارکنوں اور عوام کی کثیر تعداد نے شرکت کی۔

مقررین نے کہا کہ پی ٹی آئی محب وطن سیاسی جماعت ہے اور فوج سمیت تمام ادارے ہمارے اپنے ہیں ہماری پارٹی انہیں نقصان پہنچانے کا تصور بھی نہیں کر سکتے۔

(جاری ہے)

انہوں نے کہا کہ ہم اپنے قائد کے ساتھ ڈٹ کے کھڑے ہیں اور وہ جو بھی حکم دیں گے اس پر عمل کریں گے اور کوہاٹ کے کارکن پارٹی کے ہر اول دستے کا کردار ادا کریں گے۔ نوجوان پارٹی لیڈر مراد سعید کا ذکر کرتے ہوئے مقررین نے کہا کہ ان کا قصور یہ ہے کہ وہ عمران خان کا بے لوث اور جانثار کارکن ہے۔

ہمارا مطالبہ ہے کہ نا حق اور بے گناہ قید پارٹی قائد عمران خان، دیگر پارٹی رہنماؤں اور کارکنوں کو فوری طور پر رہا کیا جائے اور مراد سعید کو تحفظ فراہم کیا جائے۔ انہوں نے اپنے اس عزم کو دہرایا کہ پارٹی قائد اور تمام پارٹی رہنماؤں اور کارکنوں کی رہائی تک یہ تحریک جاری رہے گی۔