گورنر سندھ کی اسٹریٹ کرائم میں قتل ہونے والے تراب زاہدی کی رہائش گاہ آمد، لواحقین سے اظہار تعزیت

کراچی (اُردو پوائنٹ اخبارتازہ ترین - اے پی پی۔ 14 اپریل2024ء) گورنر سندھ کامران خان ٹیسوری اسٹریٹ کرائم کا شکار ہونے والے تراب زاہدی مرحوم کی رہائش گاہ پہنچے اور تراب کے والد نثار زاہدی سے اس افسوسناک واقعہ پر اظہار تعزیت کیا۔ اتوار کو جاری اعلامیہ کے مطابق گورنر سندھ نے کہا کہ اس انتہائی افسوسناک واقعہ پر دکھ کے اظہار کے لئے ان کے پاس الفاظ نہیں ہیں، گورنر سندھ نے تراب زاہدی کے والد کو قاتلوں کی گرفتاری کی یقین دہانی کروائی اور مرحوم تراب کے بچوں کے تعلیمی اخراجات اور فلیٹ کا کرایہ ذاتی حیثیت میں ادا کرنے کا اعلان بھی کیا۔

گورنر سندھ نے مرحوم تراب کے درجات کی بلندی اور لواحقین کے لئے صبر جمیل کی دعا بھی کی۔ بعد ازاں میڈیا سے گفتگو میں گورنر سندھ نے کہا کہ آج وہ یہاں گورنرسندھ کی حیثیت سے نہیں بلکہ کراچی کے ایک بیٹے کے طور پر آئے ہیں اور انہوں نے تراب کی والدہ کو کہا ہے کہ وہ انہیں اپنا بیٹا سمجھیں۔

(جاری ہے)

انہوں نے مزید کہا کہ کراچی کے نوجوان مسلسل اسٹریٹ کرائمز کا شکار ہورہے ہیں۔

گورنر سندھ نے کہا کہ اس واقعہ میں ملوث مجرمان کو جلد از جلد گرفتار کر کے قرار واقعی سزا دلوائی جائے گی۔ انہوں نے مزید کہا کہ نگہبان کیمروں اور پیٹرولنگ میں اضافے سے شرپسندوں پر کڑی نظر رکھی جائے۔ گورنر سندھ نے ایک سوال کے جواب میں کہا کہ ملک کے معاشی حب میں اس طرح کی وارداتیں افسوسناک ہیں اور خصوصا ًشہر قائد میں اسٹریٹ کرائمز میں دن بدن اضافہ تشویشناک ہے۔ گورنر سندھ نے کہا کہ وہ ان واقعات کی روک تھام کے لئے متعلقہ حکام کی توجہ مبذول کرواتے رہیں گے۔