طوفانی بارشیں ،بلوچستان میں 2 روز کیلئے سکول بند ، متاثرہ علاقوں میں رین ایمرجنسی نافذ

بارشوں سے نشیبی علاقے زیرآب آگئے، فصلوں اور باغات کو نقصان پہنچا ، افسران کی چھٹیاں منسو خ

پیر 15 اپریل 2024 23:02

کوئٹہ(اُردو پوائنٹ اخبارتازہ ترین - آن لائن۔ 15 اپریل2024ء) بلوچستان میں طوفانی بارشوں کے پپش نظر حکومت کا صوبے بھر میں آج اور کل اسکول میں تعطیلات کا اعلان کردیا جبکہ متاثرہ علاقوں میں رین ایمرجنسی نافذ کر دی گئی ہے،سیکریڑی سیکنڈری ایجوکیشن صالح ناصر نے نوٹیفکیشن جاری کردیا۔نوٹیفکیشن کے مطابق موجودہ موسمی حالات میں اساتذہ اور طلبا و طالبات کی حفاظت کو یقینی بنانے کیلئے چھٹیوں کا اعلان کیا گیا ہے جبکہ طوفانی بارشوں سے متاثرہ علاقوں میں ژالہ باری سے فصلوں اور باغات کو نقصان پہنچا ،بارشوں سے نشیبی علاقے زیرآب آگئے۔

متاثرہ اضلاع میں شدید تباہی لوگوں کے مکان و مال مویشی مکمل تباہ ہوگئے جبکہ صوبے بھر میں افسران کی چھٹیاں منسو خ کر د ی گئیں ہیں۔بلوچستان کے بارشوں سے متاثرہ اضلاع میں پی ڈی ایم اے کا ریسکیو آپریشن جاری ہے۔

(جاری ہے)

محکمہ موسمیات نے کوئٹہ، پشین،قلعہ عبداللہ، قلات، ڑوب، بارکھان، موسی خیل،کوہلو، سبی، لورالائی، زیارت میں تیز ہوائوں کے ساتھ مزید بارشوں کی پیش گوئی کی ہے۔

وزیراعلی بلوچستان سرفراز بگٹی نے اہم آن لائن اجلاس میں صوبائی ڈیزاسٹر مینجمنٹ اتھارٹی (پی ڈی ایم ای) کی کارکردگی پر اطیمنان کا اظہار کیا ہے۔بلوچستان میں بارشوں سے متاثرہ اضلاع میں پی ڈی ایم اے کا ریسکیو آپریشن جاری ہے۔وزیراعلی بلوچستان سرفراز بگٹی کا کہنا ہے کہ مشکل کی گھڑی میں عوام کو تنہا نہیں چھوڑ سکتے، ہنگامی صورتحال میں تمام وسائل بروئے کار لاکر عوام کی مدد کی جائے گی۔