ملاکنڈ ڈویژن میں موسلا دھار بارشیں

وزیر ماحولیات کی تمام اضلاع کے ڈپٹی کمشنرز کو الرٹ رہنے ،24 گھنٹے کنٹرول روم کو فعال ،صوتحال کی مانیٹرنگ کی ہدایت

پیر 15 اپریل 2024 23:04

پشاور(اُردو پوائنٹ اخبارتازہ ترین - این این آئی۔ 15 اپریل2024ء) خیبرپختونخوا کے وزیر برائے جنگلات و ماحولیات فضل حکیم خان یوسفزئی نے کہا ہے کہ ملاکنڈ ڈویژن میں موسلا دھار بارشوں کے باعث تمام اضلاع کے ڈپٹی کمشنرز کو الرٹ رہنے اور 24 گھنٹے کنٹرول روم کو فعال اور صوتحال کو مانیٹرنگ کرنے کی ہدایت کردی ہے۔ انہوں نے کہا کہ ہر تحصیل میں ضلعی انتظامیہ سمیت ریسکیو 1122 اور دیگر متعلقہ اداروں کو مشینری اور عملے سمیت کسی بھی ہنگامی صورتحال میں فوری رسپانس یقینی بنانے اور خدمات سر انجام دینے کیلئے سختی سے عمل درآمد کیلئے احکامات جاری کر دئیے گئے ہیں۔

انہوں نے خیبرپختونخوا کے مختلف اضلاع میں بارشوں سے ہونے والے قیمتی جانی و مالی نقصانات پر دلی ہمدردی اور افسوس کا اظہار اکیاہے۔

(جاری ہے)

وزیر جنگلات نے کہا کہ وزیر اعلیٰ خیبرپختونخوا علی امین گنڈاپور صوبے بھر میں تمام صورت حال کی خود نگرانی کررہے ہیں اور تمام واقعات پر نوٹس لیتے ہوئے لواحقین سے دلی ہمدردی اور تعزیت کا اظہار اورمتاثرہ خاندانوں کیلئے مالی معاونت کا اعلان بھی کیا ہے۔

ان خیالات کا اظہار صوبائی وزیر فضل حکیم خان یوسفزئی نے اپنے حجرہ مکانباغ میں لوگوں سے ملاقات کے دوران گفتگو کرتے ہوئے کیا۔ یاد رہے کہ صوبائی وزیر فضل حکیم خان یوسفزئی رمضان المبارک کے آخری عشرہ میں عمرہ کی سعادت حاصل کرنے سعودی عرب گئے تھے۔ انہوں نے عید الفطر بھی وہیں گزاری۔فضل حکیم خان عمرہ کی سعادت حاصل کرنے کے بعد اتوار کے روز وطن واپس پہنچے اور پیر کے روز اپنے حجرہ مکان باغ میں آنے والوں سے ملاقات کی اور لوگوں میں گھل مل گئے اور عمرہ اور عید کی مبارکباد وصول کی۔

فضل حکیم خان یوسفزئی نے کہا کہ ضلعی انتظامیہ، پولیس، ریسکیو 1122 نے سوات میں سیاحت کے فروغ کیلئے عیدالفطر کی چھٹیاں قربان کر دیں ہیں اور موسلادھار بارشوں میں سیاحوں کو ہر ممکن سہولیات فراہم کرنے کیساتھ ساتھ امدادی کاروائیوں میں بھی مصروف عمل ہیں جو خراج تحسین ہے۔