آڈٹ رپورٹ میں بے ضابطگیوں کی خبر میں کوئی صداقت نہیں، ٹرانس پشاور

امجد علی خان بدھ 17 اپریل 2024 16:46

پشاور ( اُردو پوائنٹ اخبارتازہ ترین۔ 17 اپریل 2024ء ) 9ٹرانس پشاور کی آڈٹ رپورٹ میں بے ضابطگیوں کی خبر کے حوالے سے ٹرانس پشاور کے جاری کردہ بیان کے مطابق اس خبر میں کو ئی صداقت نہیں ہے۔ ترجمان ٹرانس پشاور صدف کامل کا کہنا ہے کہ آڈٹ رپورٹ ابھی حتمی طور پر مکمل نہیں ہوئی۔ خبر کی بنیاد آڈٹ کے ابتدائی سوالیہ پیرا پر رکھی گئی ہے ۔

(جاری ہے)

کسی بھی ادارے کا آڈٹ کرتے وقت آڈٹ ٹیم کی طرف سے سوالات اٹھائے جانا ایک معمول کا عمل ہے اور آڈٹ ٹیم کی طرف سے اٹھائے گیے سوالات کو حتمی رپورٹ کے طور پر دکھانا گمراہ کن ہے۔

تمام اخراجات کی باضابطہ منظوریاں ہو چکی ہیں اور تمام آمدن کی تفصیلات کا ریکارڈ بھی موجود ہے۔ لہذا دی گئی خبر میں کوئی صداقت نہیں ۔ مزید برآں آڈٹ رپورٹ میں اٹھائے گئے تمام سوالات کے جوابات متعلقہ دستاویزات اور شواہد سمیت آڈٹ ٹیم کو مہیا کئے جا چکے ہیں۔ ٹرانس پشاور ہمیشہ سے شفافیت پر یقین رکھتا ہے اور عوام کو بہتر سے بہتر سہولت دینے کے لئے کوشاں ہے جو لاکھوں لوگوں کو سفری سہولت فراہم کر رہا ہے۔ لہذا بے بنیاد خبروں سے عوام کو گمراہ نہ کیا جائے۔