پہلے ٹی ٹونٹی سے قبل قومی ٹیم کا اہم ترین کھلاڑی زخمی ہوگیا

لاہور (اردو پوائنٹ تازہ ترین اخبار ۔ 18 اپریل 2024ء ) دائیں گھٹنے اور دائیں پنڈلی کے پٹھوں میں تکلیف کا سامنا کرنے کے بعد نیوزی لینڈ کے خلاف پاکستان کی T20I سیریز میں وکٹ کیپر بیٹر اعظم خان کی شرکت مشکوک ہے۔ پاکستان کرکٹ بورڈ (پی سی بی) اعظم خان کی دستیابی کے بارے میں فیصلہ کرنے سے پہلے ان کی ریڈیولاجی رپورٹس کے نتائج کا انتظار کر رہا ہے۔ پی سی بی نے ایک بیان میں کہا کہ "بدھ کے تربیتی سیشن کے دوران اعظم خان کو نیٹ میں بیٹنگ کرتے ہوئے اپنے دائیں گھٹنے اور دائیں پنڈلی کے پٹھوں میں تکلیف محسوس ہوئی۔

(جاری ہے)

انہیں فوری طور پر طبی امداد اور علاج فراہم کیا گیا۔" پی سی بی نے مزید کہا کہ “اعظم اس وقت میڈیکل ٹیم کی نگرانی میں ہیں اور نیوزی لینڈ کے خلاف آئندہ میچوں میں ان کی شرکت کے بارے میں فیصلہ ریڈیولوجی رپورٹس کے نتائج تک کیا جائے گا۔ "پی سی بی مناسب وقت پر مزید اپ ڈیٹس فراہم کرے گا۔" واضح رہے کہ پاکستان اور نیوزی لینڈ کے درمیان پانچ ٹی ٹوئنٹی میچوں پر مشتمل سیریز کا پہلا میچ آج راولپنڈی میں کھیلا جائے گا۔