ڈپٹی کمشنر میرپورخاص نے شہر میں پینے کے پانی کی عدم فراہمی کا نوٹس لیتے ہوئے اجلاس طلب کرلیا

متعلقہ اداروں کو ہدایت کی کہ عوام کو پینے کے پانی کی فراہمی یقینی بنائی جائے

عبید اللہ کوری منگل 30 اپریل 2024 17:45

میرپورخاص(اُردو پوائنٹ اخبارتازہ ترین۔ 30 اپریل2024ء) پ پینے کا پانی انسان کی اہم بنیادی ضرورت میں ہے جو عوام کا بنیادی حق بھی ہے۔ ان بات کا اظہار ڈپٹی کمشنر میرپورخاص سونو خان چانڈیو نے میرپورخاص شہر میں پینے کے پانی کی عدم فراہمی کا نوٹس لینے کے بعد متعلقہ محکموں کے افسران کے ساتھ اجلاس کی صدارت کرتے ہوئے کیا۔ انہوں نے مزید کہا کہ میرپورخاص کے شہریوں کو پینے کے صاف پانی کی فراہمی کو یقینی بنانا متعلقہ اداروں کی ذمہ داریوں میں شامل ہے اس لیے ضروری ہے کہ گرمی کے موسم میں عوام کو پینے کے صاف پانی کی فراہمی ترجیحی بنیادوں پر کی جائے۔

اجلاس میں میونسپل کمشنر اور پبلک ہیلتھ انجینئرنگ ڈپارٹمنٹ نے بتایا کہ پمپنگ اسٹیشنوں پر بجلی کی اوور لوڈنگ کی وجہ سے پانی کی سپلائی میں مشکلات پیش آرہی ہیں۔

(جاری ہے)

اس موقع پر محکمہ پبلک ہیلتھ انجینئرنگ کے حکام نے بتایا کہ ضلع میں 56 آر او پلانٹس ہیں جن میں سے 51 آر او پلانٹس فعال ہیں جن کے ذریعے لوگوں کو پینے کا پانی فراہم کیا جا رہا ہے۔

اس موقع پر محکمہ آبپاشی کے حکام نے بتایا کہ میرپورخاص کے شہریوں کو 6 مختلف پوائنٹس کے ذریعے پانی فراہم کیا جا رہا ہے جن میں ایسٹ جمڑاؤ، ویسٹ جمڑاؤ، 18 میل، جھڑبی، جرواری شاخ اور میرپور مائنر شامل ہیں، جبکہ اس وقت نہروں کو تقسیم کیا گیا ہے جس کے تحت میرپورخاص شہر میں بھی روٹیشن پلان کے تحت پانی فراہم کیا جا رہا ہے۔ جس پر ڈپٹی کمشنر میرپورخاص سونو خان چانڈیو نے متعلقہ مسائل کو حل کرنے اور شہریوں کو پینے کے صاف پانی کی فراہمی کو ترجیحی بنیادوں پر یقینی بنانے کی ہدایت کی۔