انسداد تمباکو نوشی کے لیے سگریٹ کی خوردہ قیمتیں بڑھانے کی تجویز

کراچی(اُردو پوائنٹ اخبارتازہ ترین - این این آئی۔ 13 مئی2024ء) دی کمپین فار ٹوبیکو فری کڈز کے کنٹری ہیڈ ملک عمران احمد نے حکومت پر زور دیا ہے ورلڈ ہیلتھ آرگنائزیشن (ڈبلیو ایچ او)بینچ مارک کے مطابق تمباکو کے ٹیکسوں کو خوردہ قیمت کے 70 فیصد تک بڑھا کر نوجوانوں میں تمباکو کے بڑے پیمانے پر استعمال کے اہم مسئلے کو حل کرے۔یہ تجویز اس وقت سامنے آئی ہے جب حکومت ایک طویل مدتی بیل آٹ پروگرام کے لیے بین الاقوامی مالیاتی فنڈ (آئی ایم ایف)کے ساتھ گفت و شنید سے قبل اگلے بجٹ میں محصولات کی وصولی میں اضافے کے اختیارات پر غور کر رہی ہے۔

پاکستان میں سگریٹ پر فیڈرل ایکسائز ڈیوٹی کا دو سطحی نظام ہے، 2022-23 میں سگریٹ پر ایف ای ڈی میں اضافہ کیا گیا، ریٹیل قیمتوں میں موجودہ ایف ای ڈی کا حصہ بالترتیب 48 فیصد اور 68 فیصد کم اور اعلی درجے کے لیے ہے۔

(جاری ہے)

ملک عمران احمد نے کہا کہ وقت آگیا ہے کہ فوائد حاصل کیے جائیں اور تمباکو نوشی کرنے والوں کی تعداد کم کی جائے، ملک کی 60 فیصد سے زائد آبادی نوجوانوں پر مشتمل ہے اور حکومت کے لیے ضروری ہے کہ انہیں تمباکو کے استعمال کی برائیوں سے بچایا جائے۔

اعداد و شمار سے پتہ چلتا ہے کہ تقریبا 19.1 فیصد بالغ (عمر 15 اور اس سے زیادہ)فی الحال کسی بھی شکل میں تمباکو استعمال کرتے ہیں جبکہ تمباکو استعمال کرنے والوں میں 31.8 فیصد مرد اور 5.8 فیصد خواتین شامل ہیں۔انہوں نے تمباکو پر ٹیکس میں 37 فیصد اضافے کی تجویز پیش کی۔جولائی 2023 سے جنوری 2024 تک ریونیو کی وصولی 122 ارب روپے تک پہنچ گئی ہے اور سال کے آخر تک یہ تعداد 200 ارب روپے سے تجاوز کرنے کی توقع ہے۔

تمباکو کا استعمال سالانہ تقریبا 160,000 اموات کے لیے ذمہ دار ہے، جو کہ ہر سال صحت کی دیکھ بھال کے اخراجات میں ملک کے جی ڈی پی کا کافی 1.4 فیصد ہے۔ملک عمران نے بین الاقوامی مالیاتی فنڈ (آئی ایم ایف)کے سروے اور مطالعات کا حوالہ دیا جس میں کہا گیا تھا کہ قیمتوں میں اضافے کے بعد پاکستان میں سگریٹ کی کھپت میں کم از کم 20 فیصد کمی واقع ہوئی ہے۔