کوہاٹ اور کرک یونیورسٹی کے وائس چانسلر پروفیسر ڈاکٹر محمد نصیرالدین کی او جی ڈی سی ایل حکام سے ملاقات

پشاور (اُردو پوائنٹ اخبارتازہ ترین - اے پی پی۔ 17 مئی2024ء) خوشحال خان خٹک یونیورسٹی کرک اور کوہاٹ یونیورسٹی آف سائنس اینڈ ٹیکنالوجی کوہاٹ کے وائس چانسلر پروفیسر ڈاکٹر محمد نصیر الدین نے اسلام آباد میں آئل اینڈ گیس ڈویلپمنٹ کارپوریشن لمیٹڈ کے حکام سے ملاقاتیں کیں، وائس چانسلر کے ہمراہ یونیورسٹی کے افسران کا وفد بھی ہمراہ تھا۔ وائس چانسلر نے آئل اینڈ گیس ڈویلپمنٹ کارپوریشن لمیٹڈ کے جنرل منیجر کارپوریٹ سوشل ریسپانسبلٹی عبدالرازق خٹک اور کمپنی کے دیگر سینئر افسران سے ملاقات کی۔

آئل اینڈ گیس ڈویلپمنٹ کارپوریشن لمیٹڈ حکام نے دونوں یونیورسٹیوں کو شجرکاری اور دیگر منصوبوں میں مدد دینے پر آمادگی ظاہر کی جن کا مقصد طلباء اور مقامی آبادی کو فائدہ پہنچانا ہے۔

(جاری ہے)

یاد رہے کہ حال ہی میں آئل اینڈ گیس ڈویلپمنٹ کارپوریشن لمیٹڈ اور دونوں یونیورسٹیوں کے درمیان الگ الگ مفاہمت کی یادداشتوں پر بھی دستخط کیے گئے تھے جو یونیورسٹیوں اور آئل اینڈ گیس ڈویلپمنٹ کارپوریشن لمیٹڈ کے درمیان تعاؤن کے عزم کو ظاہر کرتے ہیں۔

پروفیسر ڈاکٹر محمد نصیر الدین نے تیل اور گیس پیدا کرنے والے اضلاع میں طلباء اور کمیونٹیز کی فلاح و بہبود کے لیے آئل اینڈ گیس ڈویلپمنٹ کارپوریشن لمیٹڈ حکام کے تعاون پر ان کا شکریہ ادا کیا۔ پروفیسر ڈاکٹر محمد نصیر الدین نے او جی ڈی سی ایل حکام کو بتایا کہ دونوں یونیورسٹیاں اپنے نصاب میں مارکیٹ کی ضرورتوں کے مطابق کورسز تیار کریں گی تاکہ طلباء کو انڈسٹری کے تقاضے پورے کرنے کے لیے تیار کیا جا سکے۔ آئل اینڈ گیس ڈویلپمنٹ کارپوریشن لمیٹڈ حکام نے دونوں یونیورسٹیوں کے طلباء اور کمیونٹی کو مکمل تعاون فراہم کرنے کا اعادہ کیا۔