ملک کیلئے تحریک انصاف سمیت سب کو ایک میز پر بیٹھنا ہوگا،یوسف رضا گیلانی

کراچی (اُردو پوائنٹ اخبارتازہ ترین - این این آئی۔ 22 مئی2024ء) قائم مقام صدر سید یوسف رضا گیلانی نے پاکستان تحریک انصاف کو مذاکرات کی دعوت دیتے ہوئے کہا ہے کہ ملک کے لیے سب کو ایک میز پر بیٹھنا ہو گا۔پاکستان میں مسائل ضرور ہیں۔حکومت کے ساتھ مل کر مسائل حل کرنے کی کوشش کر رہے ہیں۔قائم مقام صدر مملکت نے بدھ کو کراچی میں مزار قائد پر حاضری دی اور فاتحہ خوانی کی۔

انہوں نے مہمانوں کی کتاب میں اپنے تاثرات بھی درج کیے۔اس موقع پر میڈیا سے گفتگو کرتے ہوئے قائم مقام صدر یوسف رضا گیلانی نے کہا کہ آج مزار قائد پر حاضری دینے آیا ہوں، میں پہلے ان کی قبر پر نہیں گیا تھا، میں آج بیسمنٹ میں ان کی قبر پر بھی گیا، میں ایک بار وزیر بھی تھا تو مزار قائد کی تزئین و آرائش میرے ذمے تھی۔

(جاری ہے)

انہوں نے کہا کہ آئین کے بنانے والے ننگے پاؤں مزار قائد آتے ہیں، قائد اعظم سے لوگ پوچھتے تھے آپ ملتان کیوں نہیں جاتے ہیں تو وہ میرے والد کے بارے میں کہتے تھے وہاں گیلانی موجود ہے۔

یوسف رضا گیلانی نے کہا کہ پاکستان میں مسائل ضرور ہیں، پاکستان میں 65 فیصد نوجوان ہیں، ہمارے لیڈر بلاول بھٹو بھی نوجوان ہیں ، ہم حکومت کے ساتھ ملکر پاکستان کے مسائل حل کررہے ہیں۔قائم مقام صدر نے مزید کہا کہ بانی پی ٹی آئی نے ایک کمیٹی بنائی تھی، مجھے یاد ہے اس وقت شاہ محمود قریشی بھی تھے اور لوگ بھی تھے ہم نے اس وقت انہیں انتخابات کی تاریخ دے دی تھی، پھر انہوں نے کہا ہم پوچھ کر بتائیں گے، میں نے اس وقت انکو کہا کہ آپ نے کے پی اور پنجاب اسمبلی توڑ کر غلطی کی ہمارے ملک میں اگر قتل بھی ہو جائے تو ٹیبل پر بیٹھنا ہوگا، بی بی شہید نے بھی کبھی مذاکرات کا راستہ نہیں چھوڑا۔

تحریک انصاف بھی مذاکرات پر آئے، گفتگو کا راستہ کھلا رہنا چاہیے۔انہوں نے کہا کہ حکومت جو بھی اچھے کام کرے گی ساتھ دیں گے۔ مولانا فضل الرحمن ہمارے پرانے دوست ہیں۔