آئی جی پنجاب ڈاکٹر عثمان انور کی راولپنڈی آمد، غازی کانسٹیبل انعام کے ہمراہ پولیس خدمت مرکز لیاقت باغ کا افتتاح کردیا

لاہور/راولپنڈی (اُردو پوائنٹ اخبارتازہ ترین - این این آئی۔ 22 مئی2024ء) انسپکٹر جنرل پولیس پنجاب ڈاکٹر عثمان انور نے پولیس خدمت مرکز لیاقت باغ کا افتتاح کر دیا ۔ تفصیلات کے مطابق آئی جی پنجاب ڈاکٹر عثمان انور منگل کی شب راولپنڈی پہنچے اور غازی کانسٹیبل انعام کے ہمراہ پولیس خدمت مرکز لیاقت باغ کا افتتاح کیا، آئی جی اسلام آباد سید علی ناصر رضوی، آر پی او راولپنڈی بابر سرفراز الپا، سی پی او سید خالد ہمدانی، ڈی آئی جی ہیڈ کوارٹرز اسلام آباد سید مصطفی تنویراور سینئر افسران اس موقع پر موجود تھے، آر پی او راولپنڈی نے پولیس خدمت مرکز میں شہریوں کو دی جانے والی سہولیات کے بارے میں بریفنگ دیتے ہوئے بتایا کہ پولیس خدمت مرکز میں کریکٹر سر ٹیفیکیٹ، پولیس ویریفکیشن، کرایہ داری کوائف کا اندراج،ایف آئی آر کی کاپی، لرنر ڈرائیونگ لائسنس، ڈرائیونگ لائسنس کی تجدید سمیت مختلف سہولیات فراہم کی جارہی ہیں، آئی جی پنجاب نے خدمت مرکز کے مختلف حصوں کا معائنہ کیا، سٹیٹ آف دی آرٹ طرز پر کی جانے والی اپ گریڈیشن کو سراہا، سی پی او سید خالد ہمدانی نے آئی جی پنجاب کو پولیس خدمت مرکز کی تعمیر اور تزئین و آرائش کے اقدامات پر بریف کرتے ہوئے بتایا کہ پولیس خدمت مرکز میں شہریوں کو 20 مختلف سہولیات ایک چھت تلے فراہم کی جائیں گی۔

(جاری ہے)

آئی جی پنجاب ڈاکٹر عثمان انور نے کہا کہ پنجاب پولیس حکومت پنجاب کے ویژن کے تحت خدمت مراکز کے قیام، کیمیونٹی پولیسنگ کو فروغ دینے کے لئے کوشاں ہے، آئی جی پنجاب نے کہا کہ کمیونٹی پولیسنگ کے کلچر کو فروغ دینے، عوام کو مزید بہتر سروسز فراہم کرنے،عوام اور پولیس کے درمیان دوستی کو مزید مستحکم بنانے کے لیے پولیس خدمت مراکز نہایت اہمیت کے حامل ہیں، آئی جی پنجاب نے مزید کہا کہ شہدا پولیس اور غازی اس قوم کے محسن اور ہم سب کا فخر ہیں، ان کی قربانیاں ناقابل فراموش ہیں، بعد ازاں آئی جی پنجاب نے سیف سٹی پراجیکٹ راولپنڈی کے جاری تعمیراتی کاموں کا بھی جائزہ لیا، ایس ایس پی آپریشنز فلائٹ لیفٹیننٹ (ر) حافظ کامران اصغر نے آئی جی پنجاب کو زیر تکمیل پراجیکٹس پر بریفنگ دی، آئی جی پنجاب نے ترقیاتی پراجیکٹس کو اعلی معیار کے مطابق مکمل کرنے کی ہدایت دی۔