قراقرم انٹرنیشنل یونیورسٹی اور بلتستان یونیورٹی کے مالی بحران

وزیر اعلی گلگت نے وزیر اعظم کو انڈومنٹ فنڈ زکے قیام کیلئے ایک ارب روپے صوبائی حکومت کو منتقل کرنے کیلئے مراسلہ تحریر کردیا

پیر 22 جولائی 2024 21:32

گلگت (اُردو پوائنٹ اخبارتازہ ترین - این این آئی۔ 22 جولائی2024ء) وزیر اعلیٰ گلگت بلتستان حاجی گلبر خان نے وزیر اعظم شہباز شریف کو قراقرم انٹرنیشنل یونیورسٹی اور بلتستان یونیورٹی کو درپیش مالی بحران کے حل کیلئے انڈومنٹ فنڈ زکے قیام کیلئے ایک ارب روپے صوبائی حکومت کو منتقل کرنے کیلئے مراسلہ تحریر کردیا ہے۔ اس مراسلے میں کہا گیا ہے کہ قراقرم انٹرنیشنل یونیورسٹی 10ہزار سے زائد طالب علموں کو تعلیم و تحقیق کے مواقع فراہم کررہی ہے۔

سال 2018 سے ہائر ایجوکیشن کی جانب سے قراقرم انٹرنیشنل یونیورسٹی کیلئے گرانٹ 430 ملین پر جمود کا شکار ہے، جس کی وجہ سے قراقرم انٹرنیشنل یونیورسٹی کو شدید مالی بحران کا سامنا ہے۔ اسی طرح بلتستان یونیورسٹی کو بھی آپریشنل اخراجات اور معیار تعلیم برقرار رکھنے میں مالی مشکلات کا سامنا ہے۔

(جاری ہے)

درپیش مالی بحران کی وجہ سے حکومت گلگت بلتستان کو مالی معاونت فراہم کرنے کی درخواست کی گئی ہے تاکہ گلگت بلتستان کے طالب علم بلاتعطل اعلی تعلیم جاری رکھ سکیں۔

محدود وسائل کی وجہ سے صوبائی حکومت کو ان دونوں یونیورسٹیز کیلئے مستقل بنیادوں پر مالی معاونت فراہم کرنا ممکن نہیں۔ لہذا بحیثیت چیئرمین گلگت بلتستان کونسل آپ سے گزارش ہے کہ گلگت بلتستان کونسل سے ایک ارب کی رقم قراقرم انٹرنیشنل یونیورسٹی اور بلتستان یونیورسٹی کیلئے انڈومنٹ فنڈز کے قیام کیلئے صوبائی حکومت کو منتقل کئے جائیں۔